Top 9 wanted person ti Vigan City police, naaresto

VIGAN CITY – Inaresto ti kapolisan ti maysa a drug personality iti mismo a pagtaenganna sadiay Barangay San Julian idi malem ti Nobiembre 23.

Inaresto ti nagtitipon nga elemento ti CIDT, Ilocos Sur ken Vigan City police station ni Moises Paa Fieldad, 50, baro, iti balayna sadiay Barangay San Julian Sur ditoy nga ili idi agarup 4:00 ti malem ti nadakamat a petsa.

Iti listaan ti kapolisan ditoy, ni Paa ti top 9 wanted, Vigan City level ket addaan iti alias warrant of arrest nga inyisio ni Judge Perla Querubin ti Regional Trial Court, First Judicial Region, Branch 20, Vigan City, Ilocos Sur a napetsaan idi pay laeng Hulio 29, 2009.

Sumangsango ni Paa iti panagsalungasing iti Section 11 ti RA 9165 a nai-docket iti babaen ti Criminal Case No. 6438-V ken nairekomenda nga agpiansa iti P200,000.00.

Naikustodia ti akusado iti police station ditoy para iti dokumentasion ken umisu a disposision.#