Topless nga agpasiar iti Vigan Heritage Village, maiparit

VIGAN CITY – Maysa nga ordinansa ti naidatag iti session ti sangguniang panlungsod itay nabiit a mangiparit ti panagpasiar ti asinoman nga uksob iti akinngato a paset ti bagina iti public places iti core and buffer zone ditoy siudad.

Kinuna ni Konsehal Juan Carlo Medina, autor ti nasao a resolusion, a saan a nasayaat kitkitaen dagiti naka-topless nga agpaspasiar iti Vigan, nangruna iti core and buffer zone ket maiparbeng laeng daytoy nga ordinansa a mangipawil iti panagpasiar dagitoy nga uksob iti akinngato a paset ti bagida iti nadakamat a lugar.

Masarakan iti core and buffer zone dagiti duog a balbalay a daydaywen dagiti turista.

Kapaliiwan iti kallabes nga adda dagiti uksob a trabahador nga aglasat iti core and buffer zone a pakasarakan kadagiti duog a balbalay tapno mapanda agmerienda kadagiti karinderia wenno tienda iti asideg.

Inadaptar ti konseho ti report ti committee on tourism para iti maikadua a pannakaibasana iti sumaruno a session.#