Tour of Ilocos Sur, naangay

VIGAN CITY – Agdagup iti 56 dagiti siklista a nagsasalip iti Tour of Ilocos Sur a naangay idi Mayo 29-Hunio 1 kas paset ti programa ti sports ti gobierno probinsial nga idadauluan ni Gov. Ryan Singson.

Addaan iti uppat a lap, nangrugi daytoy torneo ti bisikleta iti sanguanan ti provincial capitol, limmasat iti Bantay agingga iti Narvacan, sa nagsubli nga agpaamianan agingga iti Sinait.

Iti 2nd lap, Mayo 30, nangrugi iti Sinait, kaamiananan nga ili iti Ilocos Sur agingga iti Tagudin, kaabagatanan nga ili ti probinsia.

Iti 3rd lap, Mayo 31, manipud iti Tagudin, simmang-at dagiti siklista iti Cervantes, summer capital ti Ilocos Sur.

Iti maudi a lap, Hunio 1, manipud iti Cervantes, bimmaba dagiti siklista ket dinaliasatda dagiti ili ti segundo distrito ken naggibus iti Vigan City, nalatak a heritage city ken maysa kadagiti finalists iti 7NewWonders Cities.

Agdagup iti 70 dagiti nakipartisipar iti preliminary round ngem agdagup laeng iti 56 a nangbukel iti walo a grupo dagiti naarisit a nakisalip iti Tour of Ilocos Sur.#