Tour to store, mangipaay panggedan, pamastrekan

VIGAN CITY – Panggep ti gobierno probinsial ti pannakaipasdek dagiti tour to store tapno adda pagtaudan ti pamastrekan dagiti lokal nga agnaed manipud kadagiti turista nga agpasiar iti lugarda.

Kinuna ni Vice Gov. Deogracias Victor Savellano a “useless ti panagpasiar ti maysa a turista iti probinsia no saantayo a makinabang kadakuada”sana inyunay-unay a masapul a gumasto ti maysa a turista no mapan agpasiar iti maysa a lugar agsipud ta dayta ti bugas ti turismo.

“Masapul a mangparnuay ti turismo iti panggedan ken pamastrekan kadagiti istruktura a pagpasiaran dagiti turista,” innayon ti bise gobernador.

Kinuna pay ni Savellano a kasapulan a dagiti produkto dagiti lumugar ti mailako kadagitoy a tour to store tapno adda pamastrekan dagiti agindeg.

Malaksid dagiti daan a simbaan, adda dagiti nalatak a produkto iti probinsia a magusgustuan a gatangen dagiti turista a pakaibilangan ti bagnet, longganisa, abel-iloko nga ules, tualia, furniture, ken dadduma pay a souvenir items a produkto dagiti lumugar.#