Banner News: Tourism and cruise ship industry iti Ilocos Sur, mapadur-as— Cong. DV Savellano | Tawid News Magazine - Weekly Ilocos News 📰

Tourism and cruise ship industry iti Ilocos Sur, mapadur-as— Cong. DV Savellano

CABUGAO, Ilocos Sur — “Saan laeng a maminsan wenno mamindua nga adda sumanglad a cruise ship iti Salomague Port nga aglaon kadagiti adu a turista, ngem masapul nga agtultuloy agingga nga agbalin a naan-anay nga industria ket dumur-as ti turismo ket mabenepisiaran dagiti adu nga umili ken ti intero a probinsia.”

Dayta ti kinuna ni 1st District Congressman Deogracias Victor “DV” Savellano, kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan Iti Amianan Media Forum kalpasan ti nagsaruno nga isasanglad dagiti dua a cruise ship iti Salomague Port iti daytoy nga ili idi Disiembre 26, 2019, ken Enero 6, 2020.

Iti nagsaruno nga isasanglad dagiti cruise ships a nagkarga kadagiti nasurok a 3,500 a pasahero ket nangisangpet dagiti rinibu a turista iti Ilocos Sur a nagpasiar iti Vigan City ken dadduma pay nga ili ken lugar.

Impalagip ni Cong. Savellano a dagiti immuna a panagsanglad dagiti dua a cruise ships ket rugi laeng ti plano a mangpadur-as ti industria ti turismo iti probinsia babaen iti idadaong dagiti barko iti napnuan iti pakasaritaan a Puerto.

Impakaammona nga iti Puerto idi pay laeng un-unana a panawen ti sangsangladan dagiti ganggannaet a komersiante nangruna dagiti Tsino, ken nagrubuatan pay dagiti nagkauna a sakada nga Ilokano iti ipapanda sadiay Hawaii, USA ken nakapasamakan dagiti nadara a ranget iti nagbaetan dagiti Pilipino ken Hapones idi Maikadua a Gubat iti Lubong.

Inlawlawagna a narugianen ti panagsanglad dagiti cruise ships iti Salomague Port babaen ti pannakikaysa dagiti nagduduma nga ahensia ti gobierno kas ti Philippine Port Authority, Bureau of Customs, Bureau of Immigration, Coast Guard ken Provincial Government, ken ti Solaire Group of Companies a mangiturturong kadagiti cruise ships a nagkarga kadagiti adu a turista nga agpaspasiar iti nagduduma a paset ti lubong. Impakaammona a nangipaay ti PPA iti P340 Milion a pondo para ti pannakapaatiddog ken pannakapadur-as ti Puerto, ken manamnama a manayonan pay ti pondo.

Inlawlawagna nga iti isasanglad dagiti cruise ships iti Salomague Port ket agtalinaed manipud alas-8 iti bigat agingga iti alas-4:30 iti malem, ket mapalubosan dagiti pasahero a turista nga agpasiar kadagiti nagduduma a paset ti Ilocos Sur ken kabangibang a probinsia.

Nagapila ti Diputado iti publiko ti pannakikaysa dagiti umili kadagiti maseknan nga ahensia iti panagdur-as ti turismo ken cruise ship industry tapno amin ket mairanud kadagiti benepisio nga ipaay dagiti turista. Impaganetgetna a dagiti turista ket agpasiarda ket nasken a gastosenda dagiti kuartada ket kasapulanda dagiti adu a pagpasiaran, panganan, pagdagusan ken adu a gatangenda a produkto.

Kiniddawna ti pannakapadur-as dagiti pagpasiaran, pasilidad, nadalus a comfort rooms, ken dagiti nasayaat ti pannakaaramid ken paketena a produkto babaen ti pannarabay ti Department of Trade and Industry tapno maay-ayo dagiti turista, ken napintas ti lagip nga iyawidda kadagiti
lugar a naggapuanda.

“Ti napartak a panagbiahe kadagiti nagduduma a tourist attractions ti kayat dagiti turista, isu a nasken ti pannakaileppasen iti kabiitan a panawen dagiti narugian a Port-to-Port Road ken dagiti by-pass roads iti probinsia,” kinuna ni Cong. Savellano iti panangilawlawagna a nasken a mai-fast track dagiti road projects nga isaysayangkat ti Department of Public Works and Highways tapno nadaras ti panagdaliasat dagiti motorista.

Impakaammona a kalaksidan ti narugianen a proyekto ti Boardwalk iti Vigan City, Vigan – Cabugao coastal road, Bantay – Vigan / Caoayan by-pas road, Bantay – San Ildefonso by-pass road, ket narugianen ti proyekto a pannakabangon iti kalsada a mamagkakamang iti Cabugao, iti Nueva Era, Ilocos Norte ken Danglas, Abra tapno mapadarasto ti panagdaliasat dagiti motorista ken panagpasiar dagiti turista.

Impakaammona pay nga agtultuloy dagiti programa ken proyektona para ti pannakapadur-as ti panagmula iti kawayan, ken pannakapadur-as ti kasasaad dagiti mannalon nangruna ti irrigation projects tapno mapalag-anan dagiti mannalon iti panagpasayakda kadagiti talonda. 

Inlawlawagna nga adu dagiti nagduduma a programa ti gobierno mainaig iti scholarships, training, livelihood, health and social services ken dadduma pay a maitulong kadagiti tattao a saan nga ammo ti publiko. Indariragna kadagiti umili a dagiti agkasapulan iti tulong ken pannarabay no kasano a magun-od dagiti nagduduma a serbisio ti nasional a gobierno ket text-sanda isuna iti cellphone number-na a 0917-539-8321 tapno matulonganna ida. ●