Tourist bus, motorsiklo, nagdinnungpar, 1 natay

SAN JUAN, Ilocos Sur – Maysa ti natay idinto a uppat ti nasugatan a pakairamanan ti drayber iti panagdinnungpar ti maysa a tourist bus ken motorsiklo iti national highway sadiay Sitio Turod, Barangay Bacsil, ditoy nga ili idi bigat ti Agosto 11.

Pimmusay ni Jaime Uruloza y Ubarre, 64, naasawaan, ken residente iti Barangay Macatcatud, Magsingal, Ilocos Sur, iti Magsingal District Hospital gapu iti grabe a sugatna iti ulo.

Segun iti report, awan ti aruat a helmet ni Uruloza idi mapasamak ti aksidente.
Naireport met a naiyospital ti drayber ti bus a ni Antonio Dauag y Guillermo, 44, ken residente iti Masaya Sur, San Mateo, a nagsagrap iti sugat iti makannigid a bakrangna, ken tallo kadagiti pasaherona a pakaibilangan da Isabela Jencean Sornillo, Zhairra Agabao y De Ocampo, ken Aubrey Cabaña y Samontesa, agpapada nga estudiante iti PATTS College of Aeronotics, ngem saan a grabe dagiti sugatda.

Segun iti polis, agsarsaruno iti agpaabagatan a direksion ti bus ti Charms Aloha Travel and Tours a minaneho ni Dauag ken ti Honda Wave 110 motorcycle a minaneho ni Uruloza, ket idi makadanonda iti parte ti Sitio Turod, Barangay Bacsil, mapapati a kellaat a nagpakannigid ti motorsiklo nga agturong iti Sitio Turod idinto nga agobertek met ti minibus a nagtungpal iti pannakadungpar ti motorsiklo ken pannakaisagadna iti kalsada sa ti panangdungpar ti bus iti waiting shed iti akindaya nga abaga ti kalsada.#