Trabahador iti junk shop, napapatay

NARVACAN, Ilocos Sur – Napapatay ti maysa┬á nga stay-in worker iti maysa a junk shop sadiay Sitio Limmansangan, Margaay, ditoy nga ili idi parbangon ti Septiembre 25.

Segun iti report manipud iti polis ditoy, inreport ti maysa nga agnagan Pastor Joseph Natividad y Calano, 41, vendor ken residente iti Barangay Camarao, Narvacan a nakitana ti maysa a bangkay iti sanguanan ti Allan Junk Shop idi agarup 3:45 ti parbangon ti nadakamat a petsa.

Nabigbig idi agangay ti biktima a ni Roger Arcalinga y Viscarra, 27, baro, ken stay-in a trabahador iti nasao a junk shop ken natibo ti Lagangilang, Abra.

Nakasarak dagiti nagresponde a polis iti tallo a kapsula ken maysa a pistolized shotgun homemade one pong iti asideg ti bangkay.

Iti pannakaisurat daytoy, di pay ammo ti motibo ken asino dagiti pimmatay.

Kabayatanna, awan pay ti suspek iti pannakapapatay ti maysa nga Indian national sadiay Barangay Alangan, Magsingal, Ilocos Sur idi malem ti Septiembre 19.

Maipalagip a malaksid a napaltogan ni Mohinder Singh, 58, naasawaan, ken residente iti Zone 3, Bantay, Ilocos Sur, namalo pay iti kayo ken natakawan iti P4,000.00.

Naammuan iti polis a naipaiman iti Crime Lab Office, Bulag, Bantay ti narekobre iti crime scene a kapsula manipud iti cal 5.56mm para iti ballistics examination.#