Trabahador, naaresto iti buy bust operation

SAN JUAN, Ilocos Sur – Inaresto dagiti nagtipon nga elemento ti kapolisan ti maysa a laborer kalpasan a nagpositibo ti inwayatda a buy bust operation maikontra iti suspek sadiay Barangay Immayos Norte, ditoy nga ili idi malem ti Nobiembre 3.

Inaresto ti nagtipon nga elemento ti San Juan police station, PAIDSOTG, PDEA ISSET 1 ken PIB ISUR PPO ni Gilberto Giron y Sagun, 49, naasawaan, ken residente iti nadakamat a barangay kalpasan a nakakumpiska dagiti operatiba iti dua a heat sealed plastic sachet a nagkarga iti mapapati a shabu iti ikut ti suspek.

Narekobre pay dagiti polis ti P1,000.00 a naaramat iti buy bust operation.

Naipan ti suspek agraman dagiti nakumpiska kenkuana iti police station ditoy para iti umisu a disposision.#