Trabahador, nabagsol bayat panagpakanna iti baboy

SANTA, Ilocos Sur – Dati a susik ti mapapati a motibo iti pannakabagsol ti maysa a trabahador idi malem ti Disiembre 1 sadiay Barangay Rizal ditoy nga ili.

Nainaganan ti nabagsol a ni Monico Ynopia y Manlapaz, 19, baro, residente iti Barangay Tamag, Vigan City idinto a maysa a James Corpuz y Pastor, 35, awanan asawa ken residente iti Poblacion, San Vicente, Ilocos Sur ti suspek.

Iti report manipud iti polis ditoy, agpakpakan ni Ynopia iti baboy iti piggery idi simmangpet ti suspek ket iti awan a rason, binagsolna ti biktima a nakatiruan ti makannigid a paset ti boksit daytoy.

Naitaray ni Ynopia iti Gabriela Silang General Hospital, Tamag, Vigan City para iti pannakaagasna idinto a naglibas ni Corpuz a kuyogna ti armasna.

Iti pannakaisurat daytoy, sapsapulen pay dagiti polis ti suspek.#