Trabahador, nakasuan iti illegal a panagikut iti paltog

STO. DOMINGO, Ilocos Sur – Naipaiman iti opisina ti provincial prosecutor ti kaso a panaglabsing iti RA 10591 maikontra iti maysa a construction worker.

Maipalagip nga inaresto dagiti polis idi agsapa ti Disiembre 24 ni Marlito Pula y Barcena, 46, naasawaan, construction worker ken residente iti Barangay Nambaran, Sto Domingo, Ilocos Sur gapu ta adda ikutna a paltog.

Nasukalan dagiti polis nga adda short firearm iti uneg ti sling bag ni Pula idi nagrikisada kadagiti kustomer nga aggiinom iti Hot Ass Bar a masarakan iti Barangay Vacunero, ditoy nga ili iti dayta a parbangon.

Naituding ti inquest proceeding ti kaso a nai-docket iti babaen ti NPS Docket Number NPS-I03-INQ-16L-00323.#