Trabahador, nakasuan iti panaglabsing iti RA 9165

SAN JUAN, Ilocos Sur – Naipaiman iti provincial prosecutor’s office, Vigan City ti kaso a panaglabsing iti RA 9165 maikontra iti maysa a trabahador a natiliw iti buy bust operation sadiay Barangay Immayos Norte, ditoy nga ili idi umuna a lawas ti Nobiembre.

Maipalagip nga idi malem ti Nobiembre 3, inaresto dagiti operatiba ti San Juan police, PAIDSOTG, PDEA ISSET 1 ken PIB ISUR PPO ni Gilbert Giron y Sagun, 49, naasawaan, laborer, ken residente iti Barangay Bannuar ditoy nga ili kalpasan a nakakumpiskada iti ikut ti suspek iti dua a heat sealed plastic sachet bayat ti inwayatda a buy bust operation.

Narekobre pay dagiti operatiba ti P1,000.00 a marked money a naaramat iti operasion.

In-waived ni Giron ti kalinteganna iti babaen ti probiso ti Revised Penal Code ket nagtalinaed iti kustodia ti San Juan police.#