Footer

Trabahador, napaltogan

CANDON CITY – Maysa a trabahador ti napaltogan idi sardam ti Abril 27 ita a tawen iti Oaig-Daya, daytoy a siudad.

Nainaganan ti biktima a ni Romelito Heterosa y Aquino, 37, naasawaan, stainless steel designer, natibo ti Herero, Dagupan City, Pangasinan ngem agkaskasera iti Brgy. Oaig-Daya, daytoy a Siudad.

Iti inisial nga inbestigasion, kinuna ni Jake Monteverde y Agol, 37, awanan asawa, trabahador, natibo ti Sorsogon, Sorsogon, kaarruba ti biktima, a madamada nga agin-inum iti arak iti uneg ti kubo ti biktima idi adda simmangpet a dua a lallaki a nangibaga a gumatangda iti yelo. Timmakder ti biktima nga napan nangala iti yelo iti uneg ti kubona idi nangeg ni Monteverde ti kanalbuong ti paltog, ken kalpasanna nakitana dagiti lallaki nga gumatang koma iti yelo a pumanpanaw metten agturong iti national highway. Timmakder ni Monteverde ket ditan a nakita na ti biktima a nakalupaypay iti daga nga nadigos iti bukodna a dara.

Naitaray ti biktima sadiay City of Candon Hospital ngem indeklara ti doktor a dead-on-arrival.

Narekobre ti SOCO ti maysa nga empty shell ti bala ti caliber 9mm pistol. Agtultuloy pay laeng ti imbestigasion ti kaso.