Footer

Trabahador, pinuoranna ti balayna

BANTAY, Ilocos Sur – Gapu iti panagsubangda nga agassawa, pinuoran ti maysa a trabahador ti bukodna a balay sadiay Barangay Taleb ditoy nga ili idi rabii ti Nobiembre 9.
Naireport ti uram a napasamak idi agarup 10:45 ti rabii ti nadakamat a petsa.
Inannugot ni Jay Pee Pilar y Ducot, 31, residente iti nadakamat a barangay, a gapu iti panagsubangda nga agassawa, inruarna amin iti balay dagiti personal nga alikamenda sana pinasgedan babaen ti pusporo ti kurtina agingga iti nagdalapdap ti apuy ken dimmapo ti sibubukel a balayda.
Nupay kasta, saan a nailanad iti report no ania ti nakagapu iti panagsubang dagiti agassawa.
Nadepdep dagiti bumbero daytoy nga ili ti apuy idi agarup 11:30 iti dayta met la a rabii.
Awan ti naireport a nadesgrasia ken di pay ammo ti pateg dagiti nadadael.
Kabayatanna, dua a grenade rifles, tallo a long magazines ken maysa a short magazine ti M-16 Armalite rifle a nagkarga iti 59 a balbala ti nairuar dagiti nagresponde nga EOD personnel sakbay a dimmapo ti maysa a balay sadiay Barangay Tamag, Vigan City a naireport a nauram idi aldaw ti Nobiembre 7.
Sakbayna, impakaammo ni Wilmar Abaya Sabado, 51, naasawaan, retirado a kameng ti Philippine Army, ken residente iti nadakamat a barangay kadagiti nagresponde a polis-Vigan, nga adda nakadulin a rifle grenades ken balbala iti uneg ti balay a kukua ti anakna a ni Marvin, 32, miembro ti PA, ken nakadestino iti Manaoag, Pangasinan.
Gapu iti daytoy, dagus a timmawag dagiti polis iti Provincial Explosive and Ordnance Team a nakabase iti Bulag, Bantay para iti pannakaipanaw dagiti rifle grenades, magazines ken balbala sakbay a bumtakda ti pudot ti apuy.
Iti pannakaisurat daytoy, di pay naammuan ti nakagapu iti pannakauram ti balay a naaramid iti nalag-an a material ken pateg ti nadadael iti uram.
Naikustodia dagiti rifle grenades, magazines ken balbala ti EOD para iti umisu a disposision. (Tawid News)