Trabahador ti pagkarnabalan, naladdit ti sakana

STO. DOMINGO, Ilocos Sur – Naladdit ti saka ti maysa a trabahador iti pagkarnabalan, partikular iti Horror Train Ride a naipasdek iti public plaza ditoy nga ili a puon ti nakayospitalanna idi sardam ti Enero 1.

Napilidan ti kannigid a saka ni Rodolfo Sanopera y Palag-oc, 18, baro, ken agak-akem a mangbutbuteng kadagiti aglugan iti Horror Train Ride, ken residente iti Barangay Gisir Sur, San Manuel, Pangasinan ket naiyospital iti Gabriela Silang General Hospital para iti pannakaagasna.

Iti panagimbestiga dagiti polis, bayat ti panangbutbuteng ni Sanopera dagiti naglugan iti tren, aksidente a naikaglis ket napilidan ti makannigid a sakana.

Naipasdek ti pagkarnabalan iti plasa ditoy kas paglinglingayan bayat ti selebrasion ti Paskua ken Baro a Tawen.#