Trabahador ti polis, natiliw iti buy-bust operation

CAOAYAN, Ilocos Sur – Pinaserraan ti akinkukua ti tienda a nakaisayangkatan ti buy- bust operation a nakatiliwan ti maysa a trabahador a naglako iti maiparparit a droga idi malem ti Marso 14.

Temporario a pinaserraan ni Engr. Antonio Nolasco, akinkukua iti nasao nga stall a masarakan iti Barangay Don Dimas Querubin ditoy idinto a pinutedna ti kontrata ti panagupa ni SPO1 Bonifacio Garcia, polis a nakadestino iti Internal Affairs Service (IAS) iti Region I ken residente iti Barangay Pantay Fatima, Vigan City ken impasublina ti P3,000 a pauna nga upa daytoy iti stall.

Ngem iti konprontasion a naangay iti police station ditoy, pinaglibakan ni Garcia nga adda pannakainaigna iti panaglakuan iti marihuana iti uneg ti inupaanna nga stall babaen ti trabahadorna a ni Diego Raboy y Tacod, 23, baro, ken residente iti Barangay Pantay Fatima, Vigan City.

Tiniliw dagiti polis ni Raboy bayat ti akto a panagilakona iti maiparparit a droga iti maysa a polis a nagpammarang a gumatang iti droga.

Nakumpiska dagiti polis iti ikut ni Raboy ti maysa a heat sealed plastic sachet a naglaon iti napagango a bulong ti marihuana, 2 a heat sealed plastic sachets a nabungon iti nakunes a papel nga agdagsen iti sumurok kumurang a 9.2 grams a mapattapatta nga agbalor iti P230.00, maysa a P100.00 a naaramat iti buy-bust operation nga addaan iti serial number AF406969 marka a BBC1, ken P20 a naaramat met laeng iti nasao nga operasion a nagmarka iti BBC2, P75.00 iti nadumaduma a denominasion a mapapati a naggapu iti panaglakuan iti droga, maysa a disposable lighter, ken maysa a unit a puraw a cellular phone.

Insayangkat dagiti nagtitipon nga elemento ti Caoayan Police Station nga indauluan ni PSI Edgar Pamani Quiton ken Ilocos Sur Provincial Police Office PAIDSOTG nga indauluan ni PCI Faustino Cogoy Bandao babaen ti superbision ni Provincial Director Police Senior Supt. Noel Baguitan Amoyen ken iti koordinasion ti PDEA Region I ti buy-bust operation maikontra ken ni Raboy bayat ti panaglutona iti chicken joy iti nasao a puesto babaen ti panagpammarang ti maysa a polis a gumatang iti maiparparit a droga.

Sinaksian ni Ryan Pardo ti Core TV ti nasao nga operasion.

Iti pannakaisurat daytoy, adda ti suspek iti kustodia dagiti polis para iti maikanatad a disposision idinto a naisubmite dagiti nakumpiska nga ebidensia iti Ilocos Sur Crime Laboratory Office para iti pannakaamirisda.#