Trabahador, tinagbat ti amana

CABUGAO, Ilocos Sur – Pannakabartek ti ramut iti pannakatagbat ti maysa a construction worker babaen ti amana sadiay Barangay Sagayaden, ditoy nga ili idi rabii ti Nobiembre 6.

Segun iti report, nabartek ni Melchor Arce y Valledor, 43, awanan asawa, construction worker, ket nagprobokar iti balayda ken nagdadael kadagiti alikamen iti kusina.

Pinagtalna ni Marcelino, 65, ni Melchor ngem saan a nangipangpangag daytoy.

Gapu iti daytoy, nagpungtot ti ama ket nangala iti buneng sana tinagtagbat iti sumagmamano a beses ti ulo ken bagi ti biktima.

Naitaray ni Melchor iti Pira Clinic and Hospital, Cabugao idinto a naipan ni Marcelino iti Cabugao Police Station.#