Footer

Traders, agparpartuat, adalenda pay inlungalong mannalon a presio ti tabako

QUEZON CITY – Ima-ima dagiti mannalon a nagawid gapu ta awan pay ti naglawagan ti ilunglungalongda a presio ti tabako iti tripartite meeting a naangay iti opisina ti National Tobacco Administration ditoy itay Nobiembre 12.

Iti tripartite meeting, dinawat ni Rudy Salanga, presidente ti Philippine Tobacco Institute, a maikkanda agingga iti Nobiembre 16 a mangadal iti dawat dagiti mannalon.

Nupay kasta, kinuna ni Gov. Deogracias Victor “DV” Savellano a dakkel ti namnamana a mapatgan ti kiddaw dagiti mannalon a pannakaipangato ti presio ti tabako idinto nga inyunay-unayna a kasapulan unay ti pannakapapigsa ti industria ti tabako agsipud ta daytoy ti maysa kadagiti kadakkelan a pangalaan ti maysa a probinsa iti pondo para kadagiti naduma-duma a proyektona.

Innayonna a no saan a pagtitinnulongan dagiti amin a maseknan ti pannakaipangato ti presio ti tabako, apektado ti probinsia ti Ilocos Sur iti bingayna iti R.A. 7171.

Indauluan da Cong. Eric Singson ken Gov. Deogracias Victor “DV” Savellano ti delegasion dagiti agmulmula ti tabako a timmabuno iti 2007 Tobacco Tripartite Consultative Conference ket ditoy nga inlungalongda ti pannakaingato ti presio ti naluto a bulong ti tabako.

Idi Oktubre 16, inangay ti gobierno probinsial ti Tobacco Summit  babaen ti initiatibo ni Savellano ken timmabunuan ni Singson no sadino nga indatag dagiti tobacco farmers dagiti problemada kangrunaan ti kinababa ti presio ti produktoda a tabako iti baet a dumakdakkel ti mabusbosda iti inputs.

Alegasion pay dagiti agmulmula ti tabako ti mapaliiwda a nakurang a panangisakitda kadakuada ti NTA.

Iti panagbisita ni Savellano iti Hunan,China, naduktalanna a P200 kada kilo ti presio ti Grade A a tabako ken P100 kada kilo ti reject idinto nga itay napan a tawen, P55 kada kilo laeng ti panaggatang dagiti traders iti Grade A a tabako.

Kinumpirmaran ni Singson nga uray iti Malaysia, P200 kada kilo ti panaggatang dagiti traders iti tabako.

Napag-aanamongan iti nasao a summit ti proposed 2007-08 floor price ti tabako, kas sumaganad:  AA- 73.46, A- 71.96, B – 69.96, C – 67.96, D – 62.96,  E – 61.96, F1 – 55.96,  F2 – 54.96, ken reject – 33.96.

Bayat ti tripartite meeting, kinuna ni Singson, nga ibilangda nga urgent ti idadar-ayda iti nasao a tobacco tripartite  agsipud ta kasapulan ti panangtulong kadagiti mannalon iti kasapaan a gundaway ta maibasar iti rekord, bumasbassiten ti produksion ti tabako gapu iti kinababa ti presio a panaggatang dagiti traders a puon met ti pakalugian dagiti agmulmula iti tabako.#