SAN JUAN, Ilocos Sur – Naglukaten dagiti trading centers nga aggatang iti tabako iti umuna a distrito ti probinsia, daytoy ti naammuan manipud iti National Tobacco Administration area supervisor.
Kinuna ni NTA Area Supervisor Jose Taclas a pormal a naglukat dagiti trading centers nga aggatang iti tabako itay Pebrero 8.
Nupay adda dagiti maud-udi nga aglukat, manamnama nga amin a trading centers ket aglukatda iti saan a naladladaw ngem Pebrero 18 nga aggatang iti tabako.
Mangnamnama dagiti mannalon a nasayaat ti presio ti tabako iti daytoy a tobacco season.
Iti napalabas a panagtatabako, immabut iti P 79 kada kilo ti presio ti napintas ti kalidadna a tabako idinto a P44 kada kilo ti presio ti reject a tabako.#
