Trahedia iti bisperas ti Semana Santa ken panawen ti kampania

AWAN kadin ti panagbuteng dagiti managdakdakes a tattao iti linteg ti Dios ken gobierno ta iti laksid a kabayatan ti Kuaresma, bisperas ti Semana Santa ken kangitingit ti kampania dagiti kandidato para iti masungad nga eleksion ket ginudasda ti kakaisuna a biag ti maikadua nga inunaan a kabsatmi?

Nalawag ti maysa kadagiti 10 a Bilin ti Dios: Dika mamapatay. Ngem napukawen ti panagraem dagiti kriminal iti linteg ti Dios ta uray mismo a bisperas ti Domingo Ramos a rugi ti Semana Santa a mangipalagip ti panagtutuok ken ipapatay ni Apo Jesucristo iti krus, ken panagungarna, ket nagari kadakuada ti kinadakes ti demonio tapno isikatda ti nakaam-ames a pammapatay.

Election Gun Ban, agrurutap a checkpoints nga isaysayangkat dagiti kameng ti Philippine National Police nangruna kadagiti national highways tapno malappedan ti pannakapasamak dagiti krimen iti panawen ti kampania ken eleksion. Ngem kasano ti kaepektibo ti pannakaipakat ti Election Gun Ban ken dagiti checkpoint iti Ilocos Sur ta adda latta dagiti makalusot a kriminal nga agisayangkat kadagiti nakaam-ames a pammapatay? Nagadu a checkpoints ngem dagiti met laeng nakamotorsiklo nga awanan-helmet ken lisensia dagiti matiliwda ta saan met a malapdan dagiti krimen nga isaysayangkat dagiti armado a riding-in-tandem.

Nasirib wenno nalaing la unayen dagiti kriminal tapno malusotanda latta dagiti polis, wenno talaga a nakapuy laeng dagiti dadduma a pannakabagi ti linteg iti laksid ti napalaus a suporta kadakuada ti administrasion ni Presidente Rodrigo Duterte tapno malapdan dagiti mapaspasamak a krimen iti pagilian?

Ania la unayen aya ti nadagsen a basol ken nagkamtudan a naaramid ti kabsatmi iti padana a tao tapno lak-amenna ti nakaam-ames a pannakapapatay iti panawen ti Semana Santa ken kampania iti politika? Ngem urayto pay ni Apo Jesucristo a bin-ig a kinaimbag ti inar-aramidna ket insikat a papatayen dagiti gumurgura, immapal ken nagamak iti isaksaknapna a Naimbag a Damag.

Dagita a saludsod dagiti ibirbirokak iti makapnek a pannakailawlawag ken sungbat kalpasan ti nadangkok a pannakapapatay ti manongmi nga Arturo Aquino Alviar, 60, pamiliado, ken agdama a sekretario ti Barangay Lapting, San Juan, Ilocos Sur, ken Presidente ti Farmers’ Association idi pasado alas-8 iti sardam ti Abril 13, 2019, kabayatan ti panpannagnana iti igid ti National Highway – iti sango a mismo ti lote a papaupaan a kukua ti pamiliami – nga agturong sadiay Barangay pavement tapno tumulong ti pannakaisagana ti pavement iti maangay a political rally ti Bileg Party a madama nga agkamkampania iti kabangibang a barangay.

Maibasar iti imbestigasion ti PNP ken ti CCTV footage, inuray dagiti nakalugan iti motorsiklo ket pinaltoganda iti point blank wenno dandani deppel iti muging ken agsumbangir a barukongna babaen iti pistola, kalibre .45 kas maibasar kadagiti narekobre a kapsula ti bala.

   No man pay asideg laeng ti nakapasamakan ti krimen, saanmi a nadnadlaw ti pammaltog ta madama nga agbuybuyakami iti telebision. Naamuak laeng ti pannakapapatay ti manongmi babaen ti adingek a hepe ti kabangibang a Police Station a nagdardaras a napan iti crime scene kalpasan nga intawag kenkuana ti kabagianmi met laeng a polis. Naamuan a nagresponde dagiti lokal a polis iti nasapsapa a kaso ti pammagsol ken stabbing incident iti nauneg a barangay iti ilimi ken mabalin a nakumikomanda gapu kadagiti maangay a political rally iti ilimi.

Kas multi-media practitioner a kameng ti Catholic Media, ken sigud a nagserbi iti Armed Forces of the Philippines, ken addaan kadagiti kakabsat nga opisial ti PNP ken Philippine Public Safety College a pagad-adalan ken pagsansanayan dagiti polis ken unipormado nga ahesia ti gobierno, ket nasken nga talken ti proseso ti linteg. Ngem magun-odto ngata ti hustisia ti napapatay a kabsatmi?

Nagduduma nga anggulo ken motibo dagiti dukduktalen dagiti pannakabagi ti linteg – ti napalabas ken agdama a tiempo – ket rumbeng a malawlawaganda amin bareng isu ti mangiturong iti pannakasolbar ti krimen.

Ti napapatay a kabsatmi, sakbay iti akemna iti barangay ken komunidad, ket nagturpos iti Mechanical Engineering iti Feati University, nagtrabaho sadiay Metro Manila sakbay ti panagbalinna nga Overseas Contract Worker sadiay Saudi Arabia iti sumagmamano a tawen. Idi inyawidna ti pamiliana ken nagbalayda iti bukodda iti ilimi, nabutosan a barangay kagawad, ken maysa kadagiti napinget a lider iti oposision aginggana a nadutokan a barangay secretary ken kimmadua iti agdama nga administrasion. Kas alter-ego wenno kadua ti barangay chairman ken mangidaulo iti asosasion dagiti adu a mannalon a benepisario dagiti minilmilion ti balorna a farm machineries, equipments ken dadduma pay a kasapulan iti panagtalon, ket adu dagiti mangay-ayat kenkuana, ngem saan a maliklikan nga adda latta dagiti saan a mapagustuan ken adda latta pagkamtudan.

Iti daytoy a panawen ti kampania, saan a maliklikan a dagiti agserserbi iti barangay ket maaramatda latta kadagiti nagduduma nga aktibidad nga adda pannakainaigna iti politika.

Nadagsen iti kaunggan ken nakem ti maulila iti kameng ti pamilia ta agsingin a leddaang ken gura ti lak-amen dagiti ulilaenna a narigat nga iliwliwag ken aglunitto laeng kalpasan ti napaut a panawen. Immunan a naglak-am ti pamiliami iti kasta a sakit iti kaunggan idi napasag ti tatangmi idi Abril 11, 1982 iti karabian ti Aldaw Panagungar iti mismo a pagtaenganmi. Dua nga aldaw kalpasan ti ma-37 a death anniversary ti ipapatayna, nagkettel met ti biag ti kabsatmi. Nairanrana ngata laeng wenno adda iparparipirip ti Langit?

No dadduma, narigat a matukod ti plano ni Apo Dios no apay nga impalubosna a napasamak manen iti kasta a trahedia iti pamiliami. Ngem sino kami koma a mangkuestion iti pagayatan ti Apo a Namarsua? Saan met a masinunuo no magun-od ti hustisia iti nakaam-ames nga ipapatayna no saan nga ipinget nga annongen dagiti polis akem a sinapataada.

Ngem kas bugas ti homilia ti agkabanuag a padi a nangmisa iti pagtaenganda idi malem ti Martes Santo kabayatan ti pannakamaisayyag ti bagkayna, impaganetgetna nga uray ni Apo Jesucristo a puro nasayaat ti inar-aramidna ket liniputan ken tinallikudan dagiti inay-ayatna nga apostolna a gapu ti pannakailansa ken pannakapapatayna iti krus; ken ti panangikararag iti kabsatmi a makipagungarto met ken ni Apo Jesucristo; ken magun-odnanto ti hustisia iti nadangkok nga ipapatayna a no malibasan man dagiti nangisikat ti biagna ket lak-amendanto ti supapak ken ti basolda inton dumteng a sumaklangda iti panagukom ti Dios.