Training center, natakawan

VIGAN CITY – Saanen a natalged a kandado laeng ti pangserra iti ridaw kadagitoy a tiempo ta nadaras a dadaelen dagiti mannanakaw tapno makastrekda iti pasdek wenno pagtagilakuan a kayatda a serken.

Idi agarup 8:20 ti agsapa ti Hulio 30, maysa a report ti dimmanon iti police station ditoy nga ili a natakawan ti Maharlika Escuela de Abilidades Company a masarakan iti Barangay I, Vigan City nga imatonan ni MaryAnn Lazo y Castillo, 41, naasawaan, ken residente iti Barangay Bayubay Sur, San Vicente, Ilocos Sur.

Kinuna ni Lazo nga inserra ken kinandaduanna ti nasapa a pasdek idi agarup 5:20 ti malem ti Hulio 29 ket sa la naduktalan ti panagtakaw iti agsapa ti kabigatanna.

Maysa a Mary Jane Talingdan y Servania, 16, estudiante, ken residente iti Barangay Don Alejandro Quirolijo, Caoayan, Ilocos Sur ti nakaduktalan a mapukpukaw ti computer set ken Globe modem idi apan agreport iti nasao a training center idi agarup 7:30 ti agsapa ti Hulio 30.

Segun iti mangimatmaton iti nasao a pagsanayan, agbalor amin dagiti natakaw iti P30,000.00.

Iti panagimbestiga dagiti polis, simrek dagiti mannanakaw iti akinlaud a paset ti nasao a pasdek babaen ti panangdadaelda iti kandado ti ridaw. Ditoy met la ti rimmuaran dagiti di nabigbig a suspek.

Agtultuloy ti panagimbestiga dagiti polis no asino dagiti nangserrek iti Maharlika Escuela de Abilidades Company.#