Training iti foot spa, naisayangkat

VIGAN CITY – Aganay sangagasut nga awan panggedanna a kaprobinsiaan iti Ilocos Sur ti nagdalan iti maysa nga aldaw a panagsanay iti foot spa ken foot massage idi Enero 27 babaen ti panangesponsor ni Gov. Luis “Chavit” Singson ken pannakitinnulong ti United Ilocandia Certified Massage Thereapists Association ken ti Baluarte Zoo Foundation.

Kinuna ni Edwin Antolin,  organizer ti nadakamat a training, maysa daytoy a wagas ti gobierno probinsial ken dagiti institusion a kabinnuligna tapno maipaayan iti naan-anay a training dagiti agindeg iti probinsia aglalo kadagiti awanan panggedan.

“Babaen daytoy a panagsanay, maaddaan iti gundaway dagiti nakipartisipar a maaddaan iti livelihood. Apaman a malpas daytoy a training, nalaingdanton iti foot spa ken panagmasahe iti saka ken adda pay maited a libre a kit a pangrugianda ken adda pay sertipiko a pakakitaan a nagdalanda iti training,” inlawlawag ni Antolin.

Kinuna ni Antolin nga in-inawenda ti pannakaited iti sabali pay a training tapno maikkan iti gundaway dagiti saan a nakasali iti umuna a batch.#