Trak a nagkarga iti narra, na-impound

TAGUDIN, Ilocos Sur – Dua a lalaki ti nasalamaan dagiti polis nga agikarkarga iti lumber iti maysa a trak iti nagbedngan ti Barangay Baracabac ditoy nga ili ken iti Barangay Baringcucurong, Suyo idi rabii ti Hulio 7.

Naipan iti police station ditoy para iti naan-anay a pannakapalutpotda da Angelo Gayadan, 28, baro, residente iti Barangay Bio ditoy nga ili ngem agdama nga agnaed iti Santol, La Union,  ken ni Michael Macaya y Casem, 33, naasawaan, ken residente iti Butubut Sur, Balaoan, La Union kalpasan a nasukalan a narugrugos a narra ken teakwood dagiti ikarkarga dagiti dua iti Isuzu truck nga addaan plaka a XTB 566.

Agdagup iti 12 pedaso dagiti narugos a narra nga agduduma ti kaatiddogda ken kaakabada, 2 pedaso a 3″ x 8″ x16 ft. teakwood, 9 pedaso a 4 ft. x 1 ft. round log teakwood  ken 27 pedaso a 3″ x 8″ x 4 ft. teakwood.

Naiyawat dagiti nakumpiska a lumber iti DENR iti Bitalag, ditoy nga ili ken na-impound ti Isuzu truck.#