Trak, nabalintuag

SANTIAGO, Ilocos Sur – Kaarig ti maysa a trak ti manok a nakinngato ti karaykayna kalpasan a nabalintuag maigapu iti pannakabtak dagiti pilidna bayat ti panagdaliasatna iti Barangay Imus ditoy.

Segun iti report manipud iti polis ditoy, agturturong iti amianan a direksion ti Isuzu forward a nagkarga iti naka-plastic a softdrinks ken nakabotelia a Gatorade, addaan iti plaka RAT-377, ken minaneho ni Eduardo Madamba, 52, residente iti Barangay 4, Laoag City, Ilocos Norte, idi naikkat ti stud bolt ti pilid a nakaigapuan ti pannakabtak ti goma ket nabalintuag ti trak.

Naipan iti ospital ti drayber ti trak agraman dagiti kaduana a da Freddie Salvador, 25, taga-Cagayan ken ni Rizal Tungpalan, 60, residente iti Laoag City.

Nakaro ti dadael ti trak. (Danny Antalan)