Trak a nagkarga maipuslit a baboy, natsekpoint iti Bantay

BANTAY, Ilocos Sur – Duapulo ket innem a baboy a naipuslit ditoy probinsia para iti masungad a Paskua ti na-intercept dagiti nagtitipon nga elemento ti kapolisan sadiay Barangay San Julian ditoy nga ili idi agsapa ti Disiembre 16.

Segun iti report manipud iti polis ditoy nga ili, pinasardeng dagiti elemento manipud iti Ilocos Sur Provincial Public Safety Company, Bantay police station ken kamkameng ti Provincial Veterinary Office ti maris berde a Forward truck idi lumabas iti nadakamat a barangay idi agsapa ti Disiembre 16 a mapapati a mangidiskarga kadagiti baboy iti Vigan City wenno kaparangetna nga ili a manamnama nga agkasapulan iti ad-adu a maparti a baboy iti masungad a Paskua.

Iti panangsukimat dagiti polis iti Forward truck a minaneho ni Greg Nunez y Alviedo, 38, naasawaan, ket residente iti Quirino Boulevard, Vigan City, naduktalan a nagkarga daytoy iti 18 a fattening a baboy ken 8 a nakapon a baboy.

Tallo pay a tattao ti pasahero ti lugan a nainaganan iti Jester Paz y Pira, 22; Marlon Pugal y Pantaleon, 24, agpada a residente iti Barangay Capangdanan, Bantay, ken maysa a Ricky Zambale y Salinas, 25, baro, ken residente iti Barangay Baloleng, Mapandan, Pangasinan.

Saan nga impalubos dagiti polis ti panagbiahe pay ti nasao a lugan ken kinumpiskada dagiti kargana a baboy idi awan ti maipakita dagiti naglugan a dokumento iti pannakaibiahe dagiti animal.

Mapapati a naggapu dagiti baboy iti Pangasinan ket maideliber iti maysa a Puraw.

Saan a nailanad iti report no kasano a nakastrek ti nasao a lugan iti probinsia idinto nga adda quarantine checkpoint sadiay Barangay Bio, Tagudin, Ilocos Sur.

Iti pannakaisurat daytoy, addan iti kustodia ni Provincial Veterinarian Dr. Joey Warren Bragado ti drayber ken pahinante, agraman ti Forward truck bayat a maisagsagana ti kaso a panaglabsing iti Provincial Ordinance No. 2012-06 wenno Animal Quarantine Ordinance of the Province of Ilocos Sur maikontra kadagiti suspek.

Maipalagip nga imbilin idi ni dati a Gov. Luis “Chavit” Singson ti pannakaipainget ti panagtsekpoint dagiti maiserrek nga oversized a baboy iti probinsia gapu iti reklamo dagiti naapektaran nga agtartaraken iti baboy maigapu ta nalaka ti presio dagiti maipuslit a baboy manipud iti Pangasinan, Bulacan ken dadduma pay a probinsia, ken tapno malapdan ti iseserrek dagiti baboy a posible nga adda sakitda.

Ngem kapaliiwan iti kallabes nga adda latta dagiti maipuslit a baboy iti probinsia iti baet ti pannakaipasdek dagiti checkpoint iti Tagudin, Narvacan, ken Sinait, Ilocos Sur ken kadakkel ti multa dagiti masukalan nga aglabsing iti pammilin.#