Traktor, inarado ti motorsiklo

STA. MARIA, Ilocos Sur – Maysa a traktor ti dinungpar ti maysa a motorsiklo gapu ta di nakita ti drayber ti nagdawadaw a kayo a kargana.

Segun iti report, agdaldaliasat ti Kubota traktor a minaneho ni Hilario Pascua, 44, naasawaan, residente iti Cagayungan, Narvacan, Ilocos Sur, nga adda guyguyodenna a trailer a nagkarga iti kayo iti rangtay a sakup iti Maynganay ditoy idi dinungpar ti XRM motorcycle a minaneho ni Noli Cabalce, 22, residente iti Nanguneg East, Narvacan, Ilocos Sur ken nakikaluganan ni Alvin Ordoñez, 22, naasawaan, residente iti San Pablo, San Esteban.

Iti panagimbestiga dagiti polis, mapapati a saan a nakita ni Cabalce ti nagdawadaw a kayo a puon ti nakadungparanna iti traktor.

Naitaray ni Cabalce iti Reyes Clinic and Hospital ditoy nga ili idinto a naipan ni Ordoñez iti Central Ilocos District Hospital iti Narvacan, Ilocos Sur.#