Traktora, naited iti BACALL Farmers’ Association

CABUGAO, Ilocos Sur – Maysa a traktora ti naited iti maysa a gunglo dagiti mannalon ditoy nga ili iti babaen ti Farm Mechanization Program ti Department of Agriculture.

Naiyawat ti traktora iti Baclig-Callaguip-Lusong Suyo Farmers’ Association babaen ken ni Dominador Reynold S. Sabio, presidente, iti simple a programa a naangay iti sanguanan ti munisipio idi Nobiembre 3, 2014.

Inimatangan da Mayor Edgardo “Ediboy” S. Cobangbang, Jr., Vice Mayor Deogracias Jose Savellano, dagiti municipal officials ken dagiti personnel ti DA-LGU Cabugao nga indauluan ni Municipal Agriculturist Zenaida S. Andrada ti pannakaiyawat ti traktora iti BACALL Farmers’ Association.

Agbalor iti P2.6 million, naited ti traktora iti BACALL Farmers’ Association iti babaen ti 85-15% counterparting scheme. Agdagup iti P387,000.00 ti nagbalin a counterpart ti BACALL iti nasao a proyekto.#