TransManila, gatangenna amin a produkto a tabako dagiti nakikontrata a mannalon

SAN JUAN, Ilocos Sur – Gatangen ti TransManila Inc. amin a produkto ti tabako dagiti nakikontrata a mannalon agingga iti patuktok, daytoy ti impatalged ti maysa nga opisial ti nasao a trading firm.

Kaadduan nga agmulmula iti tabako ditoy ti naki-contract growing iti TransManila Inc..

Babaen daytoy nga iskema, ti TransManila Inc. ti mangipaay kadagiti kangrunaan a kasapulan dagiti mannalon iti panagmulada iti tabako ket maikissayto dagitoy inton aglako ti mannalon iti nasao a kompania.

Segun iti maysa nga opisial ti nasao a kompania, saan a nababbaba ngem P78.00 kada kilo ti panaggatang ti TransManila iti Class Double A a bulong ti tabako kasta met a P46.00 kada kilo ti presio ti rediek.

Ngem adda dagiti insidente nga agsupadi ti panagklase ti nasao a trading firm iti namnamaen ti mannalon a klase ti tabakona. Kuna ti maysa a mannalon a class double A ti produktona ngem no maklase iti nasao a trading firm, agtinnag laengen a class A.#