TransManila Inc., naglukaten nga aggatang iti tabako

SAN JUAN, Ilocos Sur – Naglukaten ti maysa a tobacco trading firm nga aggatang iti tabako iti maikatlo a lawas daytoy a bulan ita a tawen.

Segun ken ni Rey Pagaoisan, area operations manager, naglukaten ken rinugianen ti Trans Manila Inc. ti aggatang iti tabako itay Pebrero 18.

Kaadduan dagiti agmulmula iti tabako iti San Juan ti naki-contract growing iti Trans Manila a nakabase iti Barangay Camanggaan ditoy nga ili.

Segun iti maysa nga opisial ti nasao a trading firm, surotenda iti panaggatangda iti tabako ti dati a grading system ngem no addanto pagpangatuan ti presio ti tabako iti pormal a panaglukat ti panaggatangan, maitedto met la ti diperensia kadagiti mannalon nga immuna a naglako kadakuada iti produktoda a tabako.#