Trap gun nakadesgrasia, nagipakat, nakasuan

SUYO, Ilocos Sur – Nagipakat daytoy a mannalon iti trap gun tapno mapaksiat dagiti agdadael nga animal iti mulana ken tarakenna a dingnguen ngem nakadesgrasia daytoy ket nakasuan la ket ngarud ti nagipakat.

Iti report manipud iti police station ditoy idi Disiembre 17, nakasuan sadiay opisina ti associate provincial prosecutor iti panaglabsing iti RA 10591 ni Melecio Lassig Pucnit, 53, mannalon, ken residente iti Sitio Botigue, Man-atong, Suyo, Ilocos Sur gapu ta nakadesgrasia ti trap gun nga impakatna idi agarup 8:40 ti sardam ti Oktubre 28.

Nabigbig ti biktima a ni Eberwin Andaya y Balawen, 15, residente met laeng iti nasao a lugar.

Saan a nadakamat iti report no apay nga adda ni Andaya iti dayta a lugar iti dayta nga oras.#