Traysikel, dimmungpar iti minibus, 3 pasahero, nadundunor

NARVACAN, Ilocos Sur – Tallo a pasahero ti nasugatan idi dinungpar ti traysikel a naglugananda ti maysa a minibus iti national highway a sakup ti Barangay Bantay Abot, ditoy nga ili idi Hulio 17.

Naitaray iti Central Ilocos Sur District Hospital tapno maagasan ti sugatda da Imelda Espiritu y Cabanglan, 60, naasawaan, aglaklako iti natnateng, ken residente iti Bantay Abot, Narvacan, Ilocos Sur; Marjorie Reyes y Ramos, 25, balasang, maestra; ken  Jaydeen Montero y Botacion, 12, estudiante, agpada a residente iti Barangay Sulvec, Narvacan, Ilocos Sur.

Iti panagimbestiga dagiti polis, sarsarunuen ti traysikel a minaneho ni Orlando Botacion y Valdez, ken residente iti Barangay Sulvec, Narvacan, Ilocos Sur ti minibus a minaneho ni Clarence de Guzman y Burgorio, 28, baro, ken residente iti Barangay Codoog, Narvacan, Ilocos Sur ket idi makadanonda iti Bantay Abot, mapapati a kellaat a nagsardeng ti minibus ta adda pidutenna a pasahero ket saan a napakadaan ni Botacion.

Pinadas ni Botacion a lisian ti minibus ngem nadungparna latta ti kutit daytoy a nakadunoran dagiti tallo a pasahero.

Agpada a naipan ti drayber ti minibus ken traysikel iti police station para iti pannakapalutpotda.

Naammuan nga awan ti lisensia ni Burgorio agsipud ta kinumpiska dagiti polis-Candon gapu iti panaglabsingna iti linteg-trapiko.

Iti sabali a damag, maysa a Tamaraw FX ti nangdungpar iti maysa a motorsiklo iti kalsada Cervantes-Mankayan sadiay Barangay Comilas North, Cervantes, Ilocos Sur.

Aksidente a dinungpar ti Tamaraw FX a minaneho ni Marcio Macario y Basio, 24, baro, ken residente iti Pan-ayaoan Loo, Bugias, Benguet ti nalabaga a Honda XRM a minaneho ni Crystal Felipe y Mariano, 17, ken residente iti Sitio Gitlangan, Barangay Comillas North, Cervantes a puon ti nakadunoran ti drayber ti motorsiklo.

Iti inisial nga inbestigasion, agpada ti Tamaraw FX ken ti motorsiklo nga agpaabagatan idi mapapati a nagpakannigid a direksion ti drayber ti naudi tapno sumrek koma iti balayda a nakagapu ti pannakadungpar ti kutit ti motorsiklo.

Gapu iti impact, naikras ti motorsiklo ken ti nagmaneho a nagsagrap kadagiti dunor iti nadumaduma a paset ti bagina.

Naitaray ni Felipe iti Bessang Pass Memorial Hospital para iti pannakaagasna.

Mapapati a nakainom ti drayber ti Tamaraw FX.#