Footer

Traysikel, dinungpar ti trak, 2 natay

STA. CRUZ, Ilocos Sur – Dua nga agbasbasa ti natay kabayatan a grabe a nasugsugatan dagiti tallo pay a pasahero idi dinungpar ti maysa a dump truck ti traysikel a naglugananda iti kalsada nasional a sakup ti Barangay Sidaoen daytoy nga ili.

Natay bayat ti pannakaagasda iti Candon General Hospital da Antonio Afroilan, 4th year high school student ken ni Bea May Cacdang, 11, idinto a nakaro ti sugat dagiti nakalugananda a da Rachel Navarro, ken Mark Henson,  third year high school; ken Mary Rose Ramirez, Grade II pupil, agraman ti drayber ti traysikel a ni Christopher Guieb, 29, naasawaan, residente iti Mambog, iti ditoy met laeng nga ili.

 Agpapada nga agbasbasa dagiti biktima iti Sta. Cruz Institute ket agawiddan iti Barangay Sagat iti daytoy nga ili idi maaksidenteda.

Segun iti inbestigasion dagiti polis, agturturong iti amianan a direksion ti dump truck a minaneho ni  Jesus Castillo, 24, baro, residente iti Poblacion Este, ditoy met laeng nga ili, sarsarunuenna ti maysa a minibus idi kellaat daytoy a nagsardeng.

Nagpreno ni Castillo ngem mapapati a saan a kimmagat ti preno ket kinabigna ti manibela iti akinlaud a paset ti kalsada a nagpaigidan ti traysikel ket nagdinnungparda.

Boluntario a simmuko iti polis ti drayber ti truck.#