Traysikel, dinungpar ti van, 3 nadunor

TAGUDIN, Ilocos Sur – Nadunor ti drayber agraman dagiti pasaherona idi dinungpar ti maysa a van ti sidecar ti naglugananda a traysikel bayat panagdaliasatda iti Amburayan bridge  a sakup ti Barangay Bio ditoy nga ili idi bigat ti Agosto 15.

Naitaray da Jose Sabado y Morgate, 36, drayber, residente iti Quintarong, Bangar, La Union; Marites Legaspi y Barnachea, 54, residente iti Bio, Tagudin; ken Remedios Gavina y Lucero, 64,  residente iti Quintarong, Bangar iti Ilocos Sur District Hospital, Bio, Tagudin gapu kadagiti garumiadda.

Saan a naan-ano ti drayber ti Nissan Urvan a ni Napoleon Makil, Jr. y Andres, 37, ken residente iti Lul-Luna, Luba, Abra.

Segun iti inbestigasion, agpadaya a direksion ti traysikel ket idi makadanon iti rangtay, nagsignal ni Sabado nga agpakannawan sa naginayad ngem aksidente a dinungpar ti sumarsaruno a Nissan Urvan ti likud ti sidecar ti traysikel a nakadunoran ti drayber ken dagiti pasaherona.#