TRAYSIKEL DRAYBER KA LANG

Sarita ni Dexter Marin Fabito

(Maudi a paset)

Maysaak nga SB,” imbulladna kaniak dagiti matana. Gapu ngata ta manang ti inyawagko kaniana. “Kayatmo ngarud a sawen ket agsalsalawasawak? Oy, barok, traysikel drayber ka lang!” Pinangpangnak a kinita manipud ulo agingga iti sakak a nakapagud iti imitation a Nike.

Apo madaydayaw, ma’am,” kunam lan kasla natiliwan nga agsuksukdal iti darangidangan a papaya iti alisto ni Joel a kaduami a nagsao. “Uray no traysikel drayber kam’ laeng ket nagbannoganmi ti ipakpakanmi iti pamiliami. Dimi galad ti agkura…”

Saanen nga intuloy ni Joel ta pinerrengko. Binukbokanna ti iggem ti kanigidna a nakupin a gawed iti apog manipud iti nagawangan ti ceelin tablet.

Saanko kunaen nga agsalsalawasawkayo, ma’am. Siak ti presidenteda ditoy Zone 5 ket ammok amin ti galad dagiti miembrok,” inyalumanayko nupay natugkik ti riknak iti kinunana. Maysaak met a kagawad iti barangaymi ken am-ammok amin nga SB ditoy ilimi kunak pay koma ngem diak intuloy. “Saanmo pay la a kedngan ni Anton, Ma’am, agingga a ditay maamuan ti pudno a napasamak iti bagmo.”

Awan met bag idiay luganna, Pres.” Ni Along. Napan ngata nagbirok daytoy iti uneg ti traysikel ni Anton.

Kita’m, di adda kaniana,” pinerrengnak manen ni SB sa tinaliataliawna dagiti traysikelmi. Makatugtugawen ngatan ngem nalabit maalumiim nga agtugaw iti traysikelmi ta kaduami ti kunkunana a nangala iti handbagna.

Agtugawkayo, Apo Madaydayaw,” insungok ti traysikel ni Jeff iti abayna. Pangsutilko dayta. “Ta tawagak man ni Anton.”

Hay, mahaybladak to these people!” kasla arasaas dagiti kaduak iti session hall a miembro ti Committee on Silence ti inyarasaasna iti angin. Kasta ti awagko kadagiti kaduak ta dida met agsao no madama ti session. Adda agikurkur-it iti kopiana nga agenda, adda manangadtangad iti agtuktuklapen a bobeda, ken adda taliaw a taliaw iti kantina ni Manang Jonalyn a kabatog ti session hall. Sabali pay ti agun-uni lattan uray di pay in-recognize ni kapitan nga agsao.

Masemsemakon iti ipakpakita daytoy a balkat ngem pinagkalmak ti bagik. Kinatangam, a, ta dim’ inintonaran ti bagmo, dandanik la ibaga. Wenno kinurakotmo ket ngata nay isu a napukawmo, kunak pay koma ngem diak intuloy. Nagrigat la ket ngaminen aya ti saan a narnaruam a makiapa. Dayta ti maysa a natawidko kadagidi dadakkelko. “Diak makontak, ma’am,” kinunak idinto a nakasullat pay laeng iti lapayagko ti selponko.

Kita’m! Kita’m no di siento por siento nga adda kaniana, Mr. President!” ingato ipapababana ti kanawan nga imana. Makaitudtuduen ngata kaniak ngem dina maaramid. No makapasged la ngata dagiti kasla bumeggang a matana ket nasiramannakon.

Urayentayo laengen a makasubli ditoy, ma’am, ta diak met isuna makontak,” inyalumanayko. Napanunotko ngamin nga amangan no agpaypayso met ketdi nga adda ken ni Anton ti handbagna.

Awan ngamin ket adalyo a traysikelan isu a kasta lat’ pagsapulanyo,” insungbatna ketdi. “Naginteresanen, a, diay kaduam diay kuartak. Nagkakuartan ket uray saanen nga agpaspasada iti makatawen. Makaraman met laengen iti karnet’ baboy, piman.”

Bumaran ti puon lapayagko. Agteppelka, Lester, kinunak iti nakemko. “Dikayo koma agsasao iti kasta, Apo SB, ta adda met riknami a masaktan. Ken numan pay awan adalmi a kunam ket adda met sursuromi, ma’am.” Indagdagsenko ti panangibalikasko iti ma’am.

Ket pudno met ti kinunak, di ba?” pinagarkona dagiti kasla nagudugodan iti pentel pen a kidayna sa dimmakkel dagiti mulagatna.

Agsaoak koma ngem isu met a naguni ni Jong. “Amangan daydiay met ti naglugananyo, ma’am,” intudona ti traysikel iti abay ti bomba ti gasolina. Adda namureng ken dakkel nga styrofoam iti uneg ti sidecar. Adda iti rabaw daytoy ti panaanen met la a pagkiluan. Karkargaan ni Joby.

Tinaliawmi. Urayak la napamulagat iti naimatangak. Ti sidecar ni Anton a diak namnamaen nga adda pay la gumatang! Naipako iti kabaruan a modelo ti Rusi ngem nadadaan payen ti langana ngem ti Honda TMX-ko nga agturpos koman iti elementaria no ubing. Kitaem a talagan ti kinarigat ti biag, insennaayko.

Pakpakawan birdad!” nagarko manen dagiti kiday ti babai. “Ew! Matetanoak la ketdi a dina oras!”

Umlekak koma ngem diak ammo ta kasla makitkitak iti panunotko ti panagsapsapo daytoy nga SB idi kampania kalpasan a makilinnamano kadagiti pada nga ordinario a tattao. Nasiputak ketdi a nagkikinnissiim dagiti kakaduak.

Bueno, agkitakamto laengen ken dayta nga Anton idiay opisina ti pulis!” intebbag ti babai.

Pres! Pres!” igawidko koma ngem isu met a limtaw ni Arvin iti nagbabaetan dagiti traysikel iti amiananen a daya ti stockroom. Napataliawkami amin kaniana agraman dagiti dua nga estudiante a pasahero ni Michael – isuna ti madama nga agkarga. Nagpangato-pababa ti abagana iti panagsasaruno ti panagangesna a kunam lan agipadamag iti nagpa-ligate a bakla. “Ni Anton, sikat iti tv!”

Adda kano nabatida a bag iti traysikelna, Pres.” insaruno met ni Macmac a timpuar met laeng iti naggapuan ni Arvin.

Kasta!” immulagatko a kunam lan nakadamagak iti nagsikog a balasang. “Nakaammuanyo?”

Idiay tv, Pres. Naka-flash iti screen,” inyisem ni Arvin. “Umay kano laeng alaen ti akinkukua ditoy pilaantayo.

Isu diay tay bagko!” imbirakak met ti babai a kasla sigsigurado a mangitudtudo no asino ti ama ti sikogna. “Tawagam!” intudonak.

Tawagak koma manen ni Anton ngem isu met a sumungadda iti daya, iti sango ti Dumlao Drug Store. Isu laeng met ti pannakaamirisko no apay a diak tinawagan dagiti kaduana itay diak isuna makontak.

Itay pay a tawtawaganka, Anton, ngem naiddep sa met ta selponmo,” impasabatko. Medio nangato ti tonadak.

A, awan siguro ti signal itay addakami idiay opisina ti cable system, Pres,” kinudkod ni Anton ti ulona a kinepkepan ti nangisit ken assideg ti kawikawna a buok.

Inlidlidko met ti bukot ti kanawan a dakulapko iti mugingko ta kasla kalawag ti headlight diay MB100 ni Kumpad Daris ti pannakaammok iti gagara da Anton idiay market. Wen, napanda inpai-flash iti tv ti nabati a bag iti traysikelna.

Dayta, dayta diay bagko!” itudtudo ti SB, diak pay ammo ngamin ti naganna, ti handbag nga ig-iggaman ni Samuel.

Kinitanak ni Samuel sa inyawatna ti bag iti babai.

Dagus met a linukatan ti babai sa binilangna ti linaon dagitoy.

Awan pulos kurangna dayta, ma’am,” kinuna ni Impak. “Linuktanmi laeng ta kitaenmi koma no adda ID wenno aniaman a pakaammuanmi iti akinkukua ngem awan met.”

Thank you,” ita laeng nga immisem ti babai.

Nagsabat dagiti matami ken ti babai. Ngem dagus nga inlisina ta nalagipna ngata dagiti insasaona itay kadakami.

Thank you, Pres,” kinunana manen. Inpalawlawna ti panagkitana kadakami sa nagbueltan a nangampara iti traysikel.

Nagkikinnitakami kadagiti kakaduak. Panagkunak ket maymaysa ti pampanunotenmi: di man la nangibati uray igatangmi la iti maysa litro a softdrinks. Saan met ketdi a sakiten ti nakemmi a saan a nangted. Ngem mano la koma met ti singkuenta wenno sangagasut a naksay ngem ti beinte mil a pukawna no di insubli ni Anton.

Awan inbatina, ngem saan a dayta ti panunotentayo. Panunotentayo ketdi a nakaaramidkayo manen iti maysa a kinaimbag,” binurakko ti ulimek.

Nagpapalakpak dagiti kakaduak.

Nanguyosak iti dua gasut iti walletko sa inyawatko ken ni Jeff. “Inka mangala iti dua a litro. Igatangmonto aminen iti tinapay dayta suplina.” Kunam lan nabaon iti ay-ayam a truth or consequence iti alistona a nagturong iti DDS apaman a naawatna ti igatangna.

Immangesak iti nauneg. Saanko met a panunoten ti dua gasutko. Bassit la dayta no ar-arigen iti inaramid da Anton a pakaidayawanmi a taga-Zone 5.#