TRAYSIKEL DRAYBER KA LANG

Sarita ni Dexter Marin Fabito

(Umuna a paset)

 

“SINGKUENTA,” kinunak idinto nga inyawatko ti sangaribu ken ni Jomar iti uneg ti booth. Isu ti kahero ti gasolinaan ita aldaw.

“Immay sa met la nagpabaria,” inyisemna a nangawat iti kuarta.

“Uray ta balasang,” insungbatko a nangawat iti supli. Agtawen ngata iti sangapulo ket walo ti kaing-ingas ni Lisa Soberano a balasang a nagpagasolina. MIO ti motorna. Estudiante daytoy iti CSU.

Iti daya a paset daytoy gasolinaan iti abay ti Maharlika Highway ditoy sentro ti parkinganmi a traysikelan a Zone 5. Tultulonganmi no kua dagiti gasoline boy nga agkarga no kaburnok ti customer. Naimbag la a pagsubadmi iti kinaimbag ti akinkukua iti gasolinaan. No kasta nga adu ti matanggaran a lames iti barangaymi wenno no adu ti madaklisan iti baybay ket ikkanmi pay ida iti sidaenda. Kasingedmi amin ida nga empleado. Kinapudnona,  kumparimi payen da Joby, Jojo, Enteng ken Pareng Boy, ti taga-Samar nga idi pinaramananmi iti ginisar nga ubog ti labig ket ad-adda a simminged kadakami. “Pag-awid ko, Pare, uubusinko lahat ng labid sa amin napakasarap pala” kinunana idi a permit’ katawana a nangamluy iti apsay a buokna. Labid kunana iti labig. Dida kano ngamin ammo a sidaen ti ubog idiay lugarda.

Nagsubliak iti pagtugtugawanmi itay ken Ponso iti abay ti cashier’s booth. Immaykami itay nagtugtugaw ditoy ta dimi magustuan ti buybuyaen dagiti drayber ti tanker ken da Arvin, MacMac, ken Kumpad Daris iti pagserkan a sumrek iti stockroom iti likud.

Madamdama, adda nagsardeng a traysikel iti sango ti parkinganmi. Iti panagbaba ti nalukmeg a babai, nakaiggem iti paypay ti kanigid nga imana a nakapideg iti barukongna. Kasla maris tapingar ti manok dagiti bibigna idinto a nakadidillaw dagiti kasla kadakkel ti gandul nga aritosna. Mangopisina ti panagkunak gapu iti aruatna. Inpalabasna ti panagkitana kadagiti traysikelmi.

“Double pay, kumpad,” inyarasaas ni Ponso. Mamindua ti pletena ti kayatna a sawen gapu ta nalukmeg. Immasidegkami. Gagangay no kasta nga adda umay iti parkinganmi ket sabten ti drayber a nakapila. Wenno asinoman kadakami nga adda iti sango ti parkinganmi no adda napanan ti nakapila a drayber. Bagkatenmi metten ti kargana no adda. “Papananyo, ma’am?” inyisemko.

“Awan ti papanak,” di man la immisem. Madi ti nagdenggak iti tonadana. Adda met adalna ti panagkunak. “Birbirokek diay nagluganak itay a traysikel ta nabatik ti handbag-ko. 653 ti numero ti sidecarna.”

Agsasaruno ti numero ti traysikelmi a pangpasada ditoy ilimi. Maikabit laeng iti un-unana ti numero ti sona a pakigrupoanmi. Kas pangarigan ti numero ti traysikelko ket 5-1171 ta karamanak iti Zone 5. Zone 2 dagiti grupo nga agpaspasada ditoy. 5-653 met ken Anton a kaduami.

Ngem agpayso ngata a 653 ti nakita daytoy balkat a babai a numero ti naglugananna a traysikel?  Amangan met diay daan a sidecar ni Anton ti nakitana ta nalabit  adda gimmatang ket pinatarimaanna. Mabalin pay met ketdi nga usaren dagiti bassit lat puonanna a pagkargaan iti ilako nga ikan, piman. Ngem,  panagkunak ket rinangrangkayen dagiti trabahador ti junk shop a nangilakuanna idi. Masansan idin nga idaw-as ni Anton iti weldingan ti daan a sidecarna. Inyangaw pay ketdi kano naminsan ni Manong Silin a paspasanna ti agpataray no lumabas iti batog ti Martinez Junk Shop. Sangkakuna met idi dagiti kaduak a traysikelan a made in Italy kano. Nanglawlaw ngamin payen ti tali a pinaggalutna kadagiti dadduma a pasetna a pumanirpir wenno umanit-it no magna iti kabatuan nangruna iti kalsada ti barangayda a Balingit a kasla pagsungkaan no maiinit ken kasla naintar a babassit a piskeria no matutudo. Latinum (imbes a platinum), kuna met ni Cris ta adun ti aglati a pasetna. Kalpasan ti dua lawas, inlakon nga agpayso ni Anton iti por kilo ti sidecarna.

Pada met ngamin, piman, ni Anton a narigat ti panagbiagna. Tallo ti ubbingda nga adda elementaria. Agpadada ken baketna a haiskul la ti nalpasna isu a panagsikka ken panaglakolako iti natnateng ti pagsapulan ni Michelle. Panagraep ken panaggapas met ti pagsapulan ni Anton. Ngem gapu ta nalaka a mabannog, kinaykayatnan ti nagpasada iti traysikel. Installment ti panagbayadna iti motorna. Segunda mano ti ginatangna idi a sidecar ta kurang ti igatangna.

Napigsa ti pasada ditoy ilimi ta addan unibersidad ken innem a high school. Kasla uong met a nagtubo dagiti nagkaadu a pasdek ti negosio: hotel, dormitory, hospital, puneraria, paglakuan ti motor, lugan, ken appliances, restaurant, water refilling station, adda pay puesto ti cable system, adda pay paglakuan iti ragsak, ken ti nabiit pay a dakkel a pagtarimaanan iti lugan.

“A, ni Anton. Napandan sa idiay market, ma’am, kaduana da Jeff kada Impak ken Samuel,” insungbat ni Jong nga adda iti sikigak. “Diak la ammo no adda napanda ginatang wenno idiayda nga aguray iti paglugananda nga agawid.” Kaaduanna ngamin kadakami a drayber ti agawid iti babbalaymi kalpasan a maipila wenno maisuratmi ti numero ti sidecarmi iti napinturaan a plywood a pannakablackboardmi. Sakaminto la agsubli iti pilaanmi no namnamaenmi a dandanin batangmi ti agkarga. Isu pay ngamin ti maobraanmi iti babbalaymi. Makaobrakami pay bassit iti talon. Mabalin kano pay ti mangibiit, kas kuna ni Eric.

Nalagipko nga umut-utang kaniak ni Anton iti tallo ribu idi naminsan ta igatangna koma iti abono. Ngem awan ti naitedko ta kaipawpaw-itko ti lima ribu ken diay ubingko nga agbasbasa idiay Saint Louis University idiay Tuguegarao. Diak met maipabulod ti pundomi iti Zone 5 nga iggem ni Mang Eddie a tesoreromi no diak pay nayuman iti amin a miembrok.

“Aysus! Kinurangandan a, diay beinte mil a nagyan diay bagko!” kasla naluto a kusimay ti rupa ti babai sa ngimmato dagiti kidayna. Kasla na-friendzone.

“Panagkunak ket saanda a naginteresan diay bagmo, Manang,” pinerrengko. “No nabati man iti luganna, no la ket saan nga innala ti sabali a pasahero, saan a mapukaw. Manipud pay idi ket awan pay napukaw a karga ti pasahero ditoy parkinganmi.”

(Adda tuloyna)