Footer

Traysikel, dyip, nagdinnungpar, 1 natay

GALIMUYOD, Ilocos Sur – Natay ni Loreto Delicana, 43, naasawaan, residente iti Barangay Gaspar, Salcedo, Ilocos Sur idi nagdungpar ti luganna ken ti passenger jeep a minaneho ni Ariel Bao-baoen, 36, naasawaan, residente iti Barangay Baracbac, Galimuyod, Ilocos Sur iti Candon-Salcedo road a sakup ti Barangay Mabayag, Galimuyod, Ilocos Sur idi Marso 22.

Mapapati a kimmaut ti traysikel a minaneho ni Delicana iti linia ti makasabatna dyip iti nagkurbaan a puon ti panagdungpar dagiti dua a lugan a nakatulidan ti traysikel ken nakasugatan a grabe ti biktima.

Naitaray ni Delicana iti Candon City Hospital ngem natay bayat ti pannakataming dagiti sugatna.#