Traysikel, motorsiklo, nagdinnungpar, 2 natay

CANDON CITY – Natay ti drayber ti traysikel ken ti pasaherona gapu iti pannakidinnungpar ti luganda iti kasabetna a motorsiklo iti national highway a sakup ti Barangay Bagani Campo Santo ditoy a siudad idi rabii ti Enero 10.

Naideklara a dead on arrival da Allan Pascua y Arreola, 34, naasawaan, ken ni Michael Pascua y Ragudos, 15, agpada a residente iti Barangay Bagani Campo ditoy met laeng siudad, idi maidanonda iti Candon City Hospital kalpasan ti panagdinnungpar ti traysikelda ken ti motorsiklo a SYM Bonus X a minaneho ni Michael Gambala y Galdones, 20, baro, ken residente iti Barangay Casilagan Sur, Banayoyo, Ilocos Sur ken nakisakayan ti kalugaranna a ni Raymond Gambala y Limon, 16, baro; ken ni Jeremy Ludivico y Octaviano, 16, baro, ken residente iti Barangay Casilagan Norte, Banayoyo, Ilocos Sur.

Naammuan iti inisial nga inbestigasion nga agsabat a direksion ti traysikel ken ti motorsiklo idi mapapati a kimmaut ti traysikel iti linia ti motorsiklo a puon ti nagdinnungparanda.

Mapapati a nakainom ti drayber ti traysikel.

Agpada dagiti dua a drayber nga awan narekobre a lisensiada ken saanda a nakaaramat iti helmet.

Immun-una ngem daytoy, maysa a Grade II pupil ti dinungpar ti motorsiklo idi national highway sadiay Barangay Puerta Real, Sto. Domingo idi malem ti Enero 9.

Nainaganan ti nadungpar a ni Angelo Amarillo y Nelson, 7, Grade II pupil, ken residente iti Barangay Bulala, Vigan City ken ti nakadungpar kenkuana a ni Joie Navarro y Tadena, 27, baro, ken  residente iti Barangay Pangpangdan, Sto. Domingo.

Segun iti inbestigasion, agpaabagatan ti motorsiklo a Honda XRM a minaneho ni Navarro idi mapapati a kellaat a bimmallasiw ti ubing a puon ti nakadungparanna ken nagsagrapanna kadagiti sugat iti nadumaduma a paset ti bagina a pakairamanan ti makannawan a bitbitlogna.

Intaray ni Navarro ti biktima iti Tolentino Clinic and Hospital sa simmuko iti polis ditoy.#