BANTAY, Ilocos Sur – Gapu iti pannakasisirapna iti lawag ti masabatna a lugan di nakontrol ti maysa a welder ti manibela ti traysikelna ket naidungparna iti sangi ti rangtay.
Nadunor ti drayber a ni Jomar Salvador, 21, welder, taga-Calasiao, Pangasinan, agraman ti dua a naglugan iti traysikelna.
Naammuan iti inbestigasion nga agpalaud a direksion ti traysikel ket idi makaasideg iti rangtay iti Bulag East ditoy, nakasabat ti biktima iti lugan a napigsa ti silawna.
Mapapati a saan a nag-dim light ti lugan a nakasisirapan ti biktima ket dina nakontrol ti manibela a puon ti nakaidungparan ti lugan iti sangi ti rangtay.
Naitaray dagiti tallo a biktima iti Metro Vigan Cooperative Hospital para iti pannakataming dagiti sugatda.
