Traysikel, natakaw iti sango ti paginuman

VIGAN CITY – Saan laeng a ti arak a nainomna ti pagsakitan ti ulo daytoy a biktima no di pay ti dina mabirokan a traysikelna nga intaray dagiti mannibrong  idi parbangon ti Nobiembre 4.

Nagpulong iti polis ni Jayson Calaycay y Salmasan, 29, naasawaan, ken residente iti Barangay Puro, Magsingal, Ilocos Sur ngem agnanaed iti Barangay Tamurong, Caoayan, Ilocos Sur, kaduana da Florence Belen y Valdez, 26, single ken Benjamin  Cambat y Manegdeg, 24, single ken kakalugaranna, a natakaw ti traysikelna bayat ti panagiinomda iti Embassit Bar idi rabii ti Nobiembre 3.

Segun iti panagimbestiga dagiti polis, imparking ti biktima ti Honda TMX 155 tricycle iti sango ti Lyric Cinema a masarakan sadiay Alcantara Street, Barangay VII ditoy siudad iti agarup 8:00-9:00 ti rabii ti nadakamat a petsa sa simrek iti Embassit bar a nagiinomanda.

Naduktalan laengen ti biktima nga awanen ti traysikel iti nakaiparkinganna idi agarup 1:30 ti bigat ti Nobiembre 4.

Nagsawar dagiti polis ken pinakaammuanda dagiti kaarrubana a police stations maipapan ti mapukpukaw a traysikel ngem negatibo ti resultana.#