Traysikel, natnag iti waig

CERVANTES, Ilocos Sur – Tallo a tattao a pakairamanan ti drayber ti nadunor idi natnag ti traysikel a naglugananda iti waig sadiay sitio Nadrilyo-an, Barangay Rosario, Cervantes idi malem ti Nobiembre 5.

Naitaray iti Bessang Pass Memorial Hospital, ditoy nga ili, da Joseph Augustine y Higino, 29, naasawaan, drayber ti Honda TMX tricycle; ken dagiti dua a pasaherona a da May Anne Sacantiwan y Magadia, 13, ken Love Joy Dumal-in, 15, agpada nga estudiantge ken residenteda amin iti Barangay Aluling, Cervantes, Ilocos Sur.

Segun iti report, agdaldaliasat ti traysikel iti Cervantes-Bontoc road a sakup ti nadakamat a barangay idi napukaw ni Augustine ti kontrolna iti manibela a puon ti pannakatinnag ti traysikel iti waig.

Nagsagrap iti dadael ti traysikel.#