Traysikelan agkiddaw iti fare hike

CAOAYAN, Ilocos Sur- Kayat manen nga iriing ti gunglo ti traysikelan iti sangguniang bayan ditoy ti pannakaipangato ti plete ti traysikel ditoy nga ili.

Kinuna ti presidente ti Caoayan Tricycle Operators and Driver’s Association a mangaramidda manen iti sabali a resolusion a pangidanonanda iti arungaingda iti komite ti transportasion ti sangguniang bayan ditoy nga ili.

Segun iti presidente ti CATODA, ti panagpangato ti presio ti gasolina ken ti bassit a matmatgedanda gapu iti kaadun dagiti traysikel nga agtartaray ti daytoy nga ili ti gapuna nga iriingda manen ti fare hike ti traysikel.

Dua pisos ti kayat ti CATODA a mainayon iti regular fare ti traysikel ket agbalin a P12 ti plete manipud iti P10 nga agdama a plete.

Agbalin met a P10 ti singir kadagiti senior citizens ken studiante manipud iti agdama a P8 a plete.

Nangidatag ti CATODA iti petisionda a mangingato iti singir ti plete iti traysikel iti sangguniang bayan ditoy idi Agosto daytoy a tawen ken pimmasa iti umuna a pannakaibasana ngem kalpasanna, saanen a dimmur-as pay.

Adda agdagup iti 74 dagiti kameng ti CATODA.

Ngem itay nabiit impababa dagiti oil companies ti presio ti gasolina iti P.50/litro idinto a P1.00 iti diesel fuel gapu iti panagpababa ti presio ti lana iti global market.#