Treasurer’s ken Assessor’s Office, dumanon barbarangay agsingir miliar

SINAIT, Ilocos Sur – Mapan ti Treasurer’s Office ken Assessor’s Office kadagiti barangay ditoy nga ili tapno agsingir iti miliar manipud kadagiti saan a nagbaybayad a lumugar.

Kas insingasing ti maysa a konsehal, makikinnamayyet dagiti nasao nga opisina kadagiti barangay officials tapno mayiskediul ti ipapanda kadagiti barangay ket maukkon dagiti lumugar tapno makapatangda dagitoy para iti pannakasingir dagiti buis ti daga a dida binaybayadan.

Kinuna ni Imelda Ines, acting municipal treasurer, agpatingga laeng iti Disiembre 31, 2011 dagiti buis ti daga a singirenda ket sabalinto laeng ti masingir a miliar para iti 2012.

Agdagup iti P5.5 milion ti singiren ti munisipio a miliar kadagiti agindeg ditoy nga ili.#