Tres Tarukoy (Maikadua a paset)

Sarita ni Rilo A. Bedo

 

Nasilian man kadayta a sinao ni baketna, saanen a nagtimtimek. Nangan ketdin tapno mayiddanan. Talaga a nadagsen ti bagbagina. Parbangonen itay isardengda nga agaatanud ti nagiinum. Inyiladda lattan iti balitang a nagiinumanda idi malpasda ta didan kinabaelan ti tumakder pay. Pinanawanna pay laeng nga agur-urok ni atanudna a Narding. Adda itayen ni ‘Tanudna a Sabas iti uneg ti balayda, madama a sersermonan ni Emiang a baketna. Saanen a nagpakada. Inyal-aludoynan ti pimmanaw.

Indissona lattan ti nangananna iti paginnawan apaman a nalpas. Naikisapna ti dua a noodles a pinettakanna iti dua nga itlog. Dina linuto ti dua pay ta isunto ti lutuen ni baketna a pangaldaw dagiti ubbingda. Yiskrambolnanton tapno umadu. Sangakutsara laeng ti naibusna iti linuktanna a sardinas. Madi ti serrekna. Kasla baliktadenna ti rusokna.

Nagturong iti siledda nga agassawa. Inyiladna. Ngem nakamanon a ballikid, saan met laengen a mairidep. Timmakder idi agangay. Rimmuar. Sinapulna ni Rene Boy a kaanakanna. Nagturongda iti bangkagda iti laud. Pinagulina daytoy iti kalog a pagpausawna.

MALEM. Iti sango ti kantina da Narding a masarakan iti nagbedngan ti Barangay Aguinaldo ken Brgy. Cenal, makumikom da Sabas ken Illong a mangiplasplastar iti lamisaanda iti sirok ti sablot iti sikigan ti balay ti atanudda. Batang ita ni Narding ti agpainum.

Kastoyda nga agaatanud. Mamintallo nga agkikitada iti makalawas. Adda aldaw ti tunggal maysa nga agpainum. No adda espesial nga okasion, saan laeng a mamitlo nga agsesesionda.

Itay pay nga agkatkatay ni Illong ta umalingasaw ti maad-adobo a netib a manok manipud iti kosina. Ngem di kano met pay mabalin, kas kuna ni atanudda a Narding. Nakulbet pay laeng.

“Awan ti nakulbet a karne, ‘Tanud,” kinunana itay, “a mapabulonanan iti nasanger.”

Ngem iniseman laeng ni Narding. “Ala, iplastaryo ngaruden dayta pagsesionantayo, ‘Tanud, ta hustonto,” kinuna ketdi daytoy.

Madamdama, nagsubli ni Narding. Napaisemda ken atanudna a Sabas ta bitbiten daytoy ‘tay sangaprasko a lambanog. Apagdisso daytoy, naginnunadan a nagsiat. Makais-isem met ni Narding a nagsubli iti balay tapno alaenna ti pulotanda.

Kunam pay, naguduan ti mainum idi agsubli ni Narding.

“Awan sa ket ni baketmo, ‘Tanud?” inamad ni Illong ken Narding apaman a nagtugaw daytoy iti sangoda.

“Pimmanaw a dumayamudom, ‘Tanud. Masuron iti panangkemmegko kadayta,” intudo ni Narding iti kapudpudotanna a pulotanda.

Nagkakatawada.

“Napananna ngarud?” sinaludsod ni ‘Tanud Sabas.

“Diak ammo, ‘Tanud. Ba’am latta daydiay.”

Sumipngeten idi maibusda ti pulotanda. Ap-apirasen ni Illong ti tianna iti pannakapnekna.

“’Wan fay ahawid,” imbeddal ni Narding. “Aha fay fulohanhayo a haggo.” Timmakder. Nupay agbasingbasing, nabaelanna nga innala ti kaguduat’ lata a kaggo.

“An-anuentay’ ngarud ita dayta, ‘Tanud?’ sinaludsod ni Sabas. Limpio pay laeng ti panagsaritana. Isu ti kabayagan nga ulawen ti arak kadakuada a tallo.

Tumakder koman ni Illong tapno agpaapuy iti pagtunuanda iti kaggo iti laudenda nga agiinum yantangay adu ti nakapempen a kayo dita ngem isu met a sumungad ni Iniang. Permi a widawidna. Kasla kamkamaten ti danum nga imbuyat ni Quiel.

“Ayna, pudno ‘tay atapko. Addaka manen ditoy, nalaing a lalaki!” inyiriagna a dagus ken ni Illong. “Awanen ti inaramidyo no di ti aginum!

Kasla napat-ilan da Narding ken Sabas. Ngem saanda lattan a nagun-uni. Ammodan no kasano a makapungtot ni Iniang. Awan sansantuenna. Baka ket saggaysaenna nga ibato kadakuada dagiti kaggo. Nagimas pay met ngarud a pulotan.

Sinisiimda lattan ni Illong. Ngem kas kadakuada, nagkutitem met daytoy. Kasla ‘tay bennek a nagkaem idi makibor ti pagnaedanna.

‘Tumakderka ditan ta agawidtan!” inyagyag ni Iniang.

Ngem gapu ta  naulawen ni Illong, naibayag ti itatakderna. Ginuyod ni Iniang.

“Hayak athoy, haket,” imbeddalna.

“Gunggong! Aginlalaingka pay laeng ket dim’ la ngaruden mayaddang ‘ta sakam!”

“Hayak hunak het!” linapsut ni Illong ti imana a petpet ni Iniang.

“Makaammoka man laengen!” ket intarengtengen ni Iniang ti nagna. “Sumarunokan!” intaliawna ken Illong idi makaduapulo ngata nga addang.

“Hanud,” intapik ni Narding ken Illong idi surotenen daytoy ti asawana. “Dhim liflifatan a vahangmho hi humaruno a sisyun…”

“’Wan hanag, Fare, hik… ay won’t forgeh’ it!”

Apaman a nakasangpet iti balayda ni Illong, inaributantanen ni Iniang iti sao. Saan lattan a nagtimtimek tapno di rumaba ti saritaan. Nagdiretsuanna ketdin ti nagilad.

(Adda tuloyna)