Footer

Tribu ni Cain (MAUDI A PASET)

Ulimek ti insungbat ti alkalde kadagiti annakna. Kaipapanan ti dina maibuksilan nga iyaanamongna. Ta uray nasakit ti nakemna ti panagsasagangalda nga agkakadara, isuda ngaruden nga adda iti poder ti rumukma? Nungka!

Pudno, utangna ken ni Elmer ti panangabakna a mayor iti kallabes nga eleksion. Agsipud ta nagsanud iti kandidatorana, ket, saan a nabingay ti botosda. Ngem, kastoy metten a trinnaidor, sinnikapan ti ipagpagna dagiti ag-ama. Ituloknan nga isuda ti akimbaba? Akimbaba iti negosiante a bumakbaknang iti kinaulbod, smuggling ken droga?  Ken babaero?  Nungka!

Nagwakniten ti amin a ngatangata ken ni Mayor Rodrigo Rodis. Idi nakisao ni Alex kenkuana idi kalman maipapan iti panangbukodna ti jueteng, naisaganan ni Alex ti amin a kasapulanna iti operasionna. Umanamong man wenno sumupring, ituloy ta ituloy ni Alex ti panangbukodna iti jueteng. Di kad’ kinaawan iti panagraem ti kaanakanna kenkuana ti kaiyulogan daytoy?

Kasta met ken ni kasinsinna nga Elmer. Ti panangsungbatna iti uppat a miliones nga isugponna iti Lailo Beach Resort, maysa laeng nga apan – pangtikaw tapno agpirma ti dina binasa a linaon dagiti papeles. Ket, masinunuo ti alkalde a maysa kadagitoy ti pammalubosna nga agminas ni Elmer idiay Bantay Ligsay!  Ken, apay a nagpardas a nabartek iti arak nga insangpet ni Elmer?

Ken sinasalawasaw ti imbaga ni Elsa nga asawa ni Elmer a kaluluas ni Elmer a nagpa-Manila ken awan ni Alex iti balayda. Adda da Elmer ken Alex nga agdengdengngeg iti nagsaritaanda iti telepono. Ken ammona ti cell phone number ni lakayna!

Sanikua a tinawid dagiti ammada daydi lelongda ken ni Elmer ti ramut ti guranggura. Naarus kano iti bingay daydi ama ni Elmer. Ngem, aniat’ bibiangna kadayta?  Aniat’ basolna no nangabak iti bingay daydi amana?  Basol ni Juan ti basol ni Pedro?

Ngem, inauna ni Mayor Rodis iti kasinsinna. Isu pay ti ama ti ili a San Isidro. Rebbengenna nga urnosen ti parikut ti pamilia. Kapilitan nga agpaabak sagpaminsan kada Elmer ken Alex. No la ketdi adda kasupapakna ti abakna. Napanunotna nga aramaten ni Alma a sekretariana. Iti kina-playboy ni Elmer, masnopna a maallukoy ni Alma ni Elmer iti panagkakappiada nga agkakadara.

Mailayon ti kina-mayor-na iti San Isidro. Kalpasanna, isudanton nga aggaama ti agnanayon a. Iti panagkakappiada, nasupapakanen kadagiti ipaabakna, mangabak kada Elmer ken Alex!

Narungbo ti balay ni Mayor Rodrigo Rodis iti rabii ti Sabado. Kompleto ti pamilia ti mayor a simmarabu kada Elmer ken Alex, ti kakaisuna a kasinsinna ken ti kakaisuna a kaanakanna iti ama.

“Insan!” Napnuan rag-o nga impasabat ti mayor sa immabrasa ken ni Elmer. “Agyamanak, agyamanak unay iti iyaayyo.”

“No paglaingan ti pamilia, insan, ay, ket, daytat’ kangrunaan!”

“Kapid!”  Naggiddan da Benjamin ken Dondon nga immapungol ken ni Alex.

Bimmales ni Alex iti bara ti iliwna.

“Apay nga awan ni Elsa, insan?”  Inamad ni Mayor Rodis.

Kimmidday ni Elmer iti kasinsinna a nagkuna:

“Nasakit kan’ ti ulona… menopausal dizziness, kuna ti doctor-na,” sa nagkatawa, naisarat ti matana ken ni Alma..

Nagkatawa met ti mayor, nalayat ti isemna. Marmaraisem met ti mayora. Iti lamisaan, kadenna ni Elmer ni Alma.

Nabaknang a taraon ti sinangoda, agkakangina nga arak ti ininumda. Garakgak nga awan ti uyawna ti naibalballaet iti tungtonganda.

“Kastoy, insan,” inrugi ni Mayor Rodrigo Rodis.

Timgaak dagiti lima.

“Paburak ti panagminasmo idiay Bantay Ligsay, Elmer. Paburak met ti panangbukod ni Alex ti jueteng. Ilaksid met ti Lailo Beach Resort.”

Nagari ti naidumduma nga ulimek, agtungtung-ed da Benjamin ken Dondon.

“Agyamanak, insan!”  Naiyebkas ni Elmer.

“Thank you, uncle,” insaridat ni Alex.

“Ngem…” binitin ti mayor ti sawenna.

“Maawatak… aniat’ kondision, insan?”  Dinamag ni Elmer.

“Dimon ituloy ti agkandidato a mayor!”

“Idi dayta. Saanen ita. Ipaknitayon dayta a saritaan. Addakami iti likudmo iti panagreeleksionmo.”

“Pudno dayta, uncle,” impaipus ni Alex.

“Agrambaktayo!” Inriaw ni Mayor Rodis. “Angayek dagiti kameng ti partido inton sumaruno a Domingo. Irakuraktayo ti nagkaykaysa a bilegtayo. Okay kadakayo, Elmer?”

“Okay!”  Nagragup da Elmer ken Alex.

Nagsaknap iti San Isidro ti panagsanud ni Elmer iti kina-mayor manen. Sinarabo dagiti umili daytoy a damag iti nadumaduma a panangipatarus.

“Agsanud, agsanud ni mannanud,” inkanta nga inyellek ti maysa. “Mannanud, mannanud ta mannanud la ngarud.”

“Kinuartaan ni kasinsinna!”  Kuna met ti sabali.

“Adda kad’ mapagkalma ti kararua?”  Garakgak nga atiddog ti maisilpo iti dayta.

“Ken, jueteng, kunayo pay, a!”  Imballaet ti dadduma.

“Ken, Bantay Ligsay, hahahahaay!”

“Hahahahaay!”

Dimmanon amin dagitoy kada Mayor Rodis ken pamiliana. Kasta met kada Elmer ken Alex. Ken Alma. Awan ti epekto dagitoy a pammasagid kadakuada.

Katkatawaanda ketdi ti ikankanta dagiti mammartek.

“Bumbumtak garakgak ni akak, ni bat-og a tukak!”

Andante ti panangkanta dagiti mammartek iti panangpinalda.

“Kakabsat, dikay’ agbussog nga agmalem no bigat. Iti rabii, idiaytayto amin iti balay ni akak. Nga agrennek iti taraon ken arak!  Kutkotak!  Kutkotak!  Kakkakaok!”

Napisang ti ulimek iti tengnga ti rabii. Nagbinnales ti kanalbuong idiay Mildred Beer Garden iti amiananen ti poblasion. Nabuak ni Elmer iti turogna. Nagdardaras a nagpelles ken bimmaba. Tinurongna ti namunganayan ti kanalbuong. Naisaluket ti paltogna iti siketna.

Agsalsalungayngay da Benjamin ken Alex, nadigosda iti darada, lima a metro ti kaaddayoda.

“Alex!”  Inriaw ni Elmer. “Asino ti akingapuanan iti daytoy?”

Narigatan ni Alex a nangitudo iti kapiduana sakbay a nagsat ti angesna. Inturong ni Elmer ti paltogna ken ni Benjamin. Natay met ni Benjamin sakbay a nakalbitna ti gatilio.

Adda dumteng a lugan. Nagdarasudos a simmabat ni Elmer. Ni Mayor Rodrigo Rodis ken Dondon. Saanen a nagtaktak ni Elmer. Kinalbitna ti gatilio apagbaba pay laeng ti kasinsinna. Nabaliktad ti mayor nga awan ti arimekmekna.

“Duata, uncle!”  Kinuna ni Dondon, giddato nga immasut ken kimmalbit iti gatilio, namitlo. Giniddan ni Elmer a pimmaltog, namindua. Naggiddan dagiti ag-uliteg a napadata.#