Tricycle driver, binagkong ti padana nga agpaspasada

BANTAY, Ilocos Sur – Gapu iti inpluensia ti arak, nagsapul daytoy tricycle driver ti karirina. Resulta: nabagsol la ket ngarud.

Naammuan iti polis a sakbay ti pammagsol, agkarasubli ni Ferdinand Cabot y Ped, 37, residente iti Barangay Boquig, ditoy nga ili, iti sanguanan ti BIR office a mangsapsapul ken ni Julio Prades y Regpala, 33, padana a tricycle driver ken kalugaranna met laeng. Mapapati a nakainom ni Cabot idi sangkabirokna ni Prades.

Idi nakita ni Cabot ni Prades a nagparking iti sango ti BIR, inasitganna sana kinarit nga agboksingda iti Quirino Stadium.

Nakarurod ni Prades ket binagsolna ni Cabot a nagsagrapan daytoy iti sugat iti bakrangna.

Nabaelan ni Cabot a pinataray ti traysikelna sana indanon ti bagina iti Metro Vigan Cooperative Hospital para iti pannakaagasna.

Simmuko ti suspek iti police station. Saan a narekobre ti imuko a naaramat iti pammagsol. #