Tricycle driver, binagsol ti kinainomna

SANTIAGO, Ilocos Sur – Natay iti pammagsol ti maysa nga agpaspasada iti traysikel babaen ti kinainomna idi rabii ti Abril 9 iti Barangay Ambucao ditoy.

Naideklara a natayen ni Roland Villanueva y Supnad, 32, naasawaan, residente iti Barangay Sabangan kalpasan a binagsol ni Onopre Gamez y Escalona, naasawaan, ken residente iti Poblacion Sur ditoy met laeng nga ili.

Iti panagimbestiga dagiti polis, naggiinom ti biktima, suspek ken Redentor Garcia iti maysa a pakarso idi awan a rason a kellaat a naggawid ti suspek.

Sinurot ti biktima ti suspek tapno ibagana nga aggawiddan ngem kellaat a binagbagsol ti suspek a nagsagrapan ti immuna iti sugat iti kannigid a rusok ken barukongna a puon ti nakatayanna.

Mapapati a dati a susik ti motibo ti pammagsol.#