Tricycle driver, binagsol ti padana nga agpaspasada

VIGAN CITY – Kuestion ti panagparkingan ti ramut ti nakabagsolan ti maysa a tricycle driver ditoy siudad idi malem ti Nobiembre 14.

Nabagsol a puon ti nakatayanna ni Loreto Astrologio y Manzano, 48, naasawaan, residente iti Barangay Raois ditoy siudad idinto a nainaganan ti bimmagsol kenkuana a ni Rick Jayson Berdulaga y Rigunay, 22, baro, residente iti Barangay San Sebastian, San Vicente, Ilocos Sur.

Naammuan iti inbestigasion a sakbay ti pammagsol, nagsubang da Astrologio ken Berdulaga gapu iti mapapati a panangiparit ti suspek a saan a panagparking ti biktima iti pedestrian lane iti akinlaud a paset ti Plaza Burgos a sakup ti Jacinto Street, Barangay I ditoy siudad.

Mapapati a nakarurod ti biktima ket nagsubangda iti suspek.

Pimmanaw ti suspek ngem idi agsubli, kaduanan ti kabsatna a ni Ryan Joseph Berdugala y Rigunay, 20, ket nagsusubangda manen iti biktima a nagtungpal iti panangbagsol ti suspek ken ni Astrologio.

Naitaray ti biktima iti Metro Vigan Cooperative Hospital ngem naideklara nga awanen ti biagna.

Nakarekobre dagiti nagresponde a polis iti kitchen knife nga agatiddog iti sumurok kumurang a 9 a pulgada iti nakapasamakan ti krimen.

Naglibas ti suspek kalpasan ti pammagsol.#