Tricycle driver, DOA iti ospital

SANTIAGO, Ilocos Sur – Awanen ti biag ti maysa a tricycle driver a naidanon iti ospital kalpasan a dinungpar ti maysa a van sadiay Barangay Poblacion Sur, ditoy nga ili idi malem ti Agosto 26.

Dead on arrival iti Candon General Hospital a nakaitarayanna gapu iti grabe a sugatna ni Tirso Querubin y Imburnal, 43, balo, residente iti Barangay Tamurong 1st, Candon City.

Saan a naan-ano ti driver ti Foton closed van a ni Aldwin Osalvo y Pescador, 43, residente iti Barangay Bulag, Bantay, Ilocos Sur.

Segun iti report, agpaamianan a direksion ti Foton closed van ket idi makadanon iti pagkurbaan ti Barangay Poblacion Sur ti Santiago, mapapati a kimmaut iti liniana ti kasinnabatna a traysikel ket nupay linisian ni Osalvo, nadungparna latta ti traysikel.#