Tricycle driver, nabagkong, natay

CAOAYAN, Ilocos Sur – Pimmusay iti nakaitarayanna nga ospital ti maysa a tricycle driver a binagkong ti kalugaranna sadiay Barangay Don Quirolgico, ditoy nga ili idi rabii ti Enero 25.

Natay iti Gabriela Silang General Hospital, Vigan City ni Jay Friala y Alvares, 30, naasawaan, gapu kadagiti sugatna iti likud gapuanan ti panangbagsol kenkuana ni Egbert Quitevis y Quitoriano, naasawaan, ken kalugaranna met laeng.

Segun iti inisial a panagimbestiga dagiti polis, kasangsangpet ti biktima manipud panagpasada ket bayat ti panangiparkingna iti traysikelna, inasitgan ti suspek sana binagsol iti namindua ti likud ti biktima.

Nupay nasugatan, nagtaray ni Friala a nagpatulong iti balay ni Elvira Alverde. Immarayat met dagiti kagawad ket intarayda ti biktima iti ospital.

Naglibas ti suspek, kuyogna ti armasna kalpasan ti pammagsol.

Mapapati a pautang ti suspek a di nabayadan ti biktima ti puon ti pammagsol.#