Tricycle driver, tinagbat ti kabsatna

SALCEDO, Ilocos Sur –  Gapu iti panagprobokarna, natagbat ti maysa nga agpaspasada iti traysikel babaen ti kabsatna sadiay Poblacion Sur, ditoy nga ili idi malem ti Hulio 11.

Naitaray ni Julius Cudiamat y Pastre, 50, naasawaan, tricycle driver, ken residente iti nadakamat a barangay iti Salcedo Medicare and Hospital gapu iti sugatna iti muging gapuanan ti panangtagbat kenkuana ti manongna a ni Virgilio Cudiamat y Pastre, 56, naasawaan, mannalon.

Naammuan iti report a sakbay ti pannagbat, mapapati a nabartek ti biktima ket nagprobokar iti family houseda sa napan naturog iti traysikel nga imparkingna iti sango ti balayda.

Mapapati nga inasitgan ti suspek ti kabsatna sana inungtan.

Simrek ti biktima iti family house ngem sinurot ti suspek sana tinagbat ti adina a nakasugatan ti muging daytoy.

Narekobre dagiti nagresponde a polis ti inaramat ti suspek a pinangtagbat iti kabsatna nga agatiddog iti 21 a pulgada pakairamanan ti pametpetan.#