Tricycle drivers, tinawen a mangalada iti permitda: ordinansa

VIGAN CITY – Tapno masigurado ti karadkad dagiti pasahero wenno pannakaibiahe dagiti tagilako, mangala dagiti drayber iti traysikel iti driver’s permit manipud iti city government ditoy, daytoy ti bugas ti City Ordinance No. 18 series of 2014.

Sagudayen ti nasao nga ordinansa a makolekta kadagiti tricycle driver ti P150.00 iti tinawen para iti driver’s permit a maikabil iti sidecar ti traysikel.

Sagudayen pay ti ordinansa nga asinoman a saan a mangala iti driver’s permitna ket agmulta iti P3,000.00.

Uray no adda driver’s permitna, no saan nga impaskil ti drayber iti naituding a paset ti sidecar ti traysikel, mamulta iti P1,000.00.

Kasta met nga asinoman a drayber a mangsalungasing kadagiti probiso daytoy nga ordinansa wenno iti Transportation and Traffic Code ti Vigan iti mamitlo iti las-ud ti 12 a bulan ket madusa: Para iti umuna nga Opensa – 3 bulan a pannakasuspenso ti driver’s permit; Maikadua nga Opensa – 6 bulan a pannakasuspenso iti driver’s permit; ken Maikatlo nga Opensa – Makatawen a pannakasuspenso iti driver’s permit.#